هبو لها حل؟

هبو لها حل؟

مادريت ليله من الليالي الا الباب يدق الا وهو ذاك الشيبه من الربع حيا الله سلم الله قال جيت اتقهوى معك وافك عن خاطري شويه قلت خير وشفيك كن هموم الدنيا كلها على راسك قال اصبر واعلمك قلت اسلم قال زوجت بنتي على شاب يقرب لنا امتحني ابوه لين وافقت عالزواج الولد ماعنده وظيفه وبنتي مدرسه قلت ايوه قال تزوجوا وما كملوا شهر الا والبنت عندنا خير وانا ابوك قالت يابه انا تعبت من ذا الزوج ينام الى عصر ويصحى وطلع مع اصحابه ولايعود الا اذان الفجر هم ينام الى عصر وكل يوم وانا كذه لاياكل ولايشرب معنا ولانشوفه الا وهو خارج العصرولاهرجته ندفني لين شبعت وصك عليه وماخلاني اروح المدرسه دعيت ابوه عندي وعلمته وقال ابشر بالخير ورديت البنت واستمر الحال كما هو ويوم جت الصيفيه ضحك عالبنت وخذ فلوسها وسافر يتمشى بالخارج وعوّد قلنا يمكن ينصلح ولكن ماتغير شي نوم وسهر ويهبد البنت لاتهرجت تكفى شر عليه وش اسوي قلت والله انها بلشه طيب البنت جبت منه شي قال معها ولد قلت والله الحوسه قلت طيب وابوه مازدت كلمته قال كلمته لكن ابوه مفاتيحه ماهي معه مايسمع الا كلام مرته ومرته ماعندها الا ذا الولد وتشوفه احسن من بن سعود قال والمصيبه مسكنينها مع امه وابوه في شقتهم ومايصرف عالبيت والولد وامه وابوه الابنتي وانا استحي الربع يقربون لنا وانا ابغى بنتي تستتر ولاابغى فضايح ومعها ولد وين نغديه ولانبغاها تطلق قلت والله ياخي قفلت كل الحلول ماتبغاها تطلق وتستحي مالرجال والرجال مفاتيحه ماهي معه هذي مشكله يبغى لها الامم المتحده تحلها اقلك اصبر عليه لين اشوف لك حل قلت باسدحها لكم يمكن نلقى عندكم حل يالربع وسلامتكم؟

منقول من مقالات الكاتب الساخر(السيدغلط) موقع ومنتديات العقشان

 

 

بسيطة ..
مادام البنت هي اللي تصرف على الزوج وأبوه وأمه

أنا ارى إن الأب يسكنها عنده هي وزوجها

منها ياكل مع الأكاله .. ( لاعاد مال البنت مأكول فكل معهم )
ومنها .. يفرع للبنت إذا جت حزة الندف

ويستاهل .. ليش يزوج بنته على واحد من قرابته ..

وأكيد ما شار بالزواج من هذا القريب إلا أم البنت .. فأنا ارى إذا جت البنت تشتكي من الدهف واللبد والندف يختلص الشيبة لبنته في امها يندفها لين تقل كان ياشيبة بقعا ..

والظاهر إن السيد غلط .. عائش في هموم واحزان ومشاكل عندها ( الموت استر له )




هيا لاتقولون إني من محرّقي العشاش ... تراني احب الستر وجبت للرجال حل ..

 

 

العم عبدالله جا يكحلها واعماها

بكل بساطه تاخذ ولدها وشنطتها وتروح بيت ابوها بلا تصرف عليه وعلى اهله
الا مالت على كذا رجّال نص كم ولا المصيبه بعد يسافر ويتمشى بفلوسها خيبه والخنافر واللّعْوه
وطالما هي موظفه فماهي بحاجة ثور ينطح ويرتح
يسدها ولدها لاكبر الله يعينها على تربيته والطلاق خلاص ماهو بعيب ولافضيحة في حق المرأة الآن

وهذا شوري قبل لايجيلها بنات يكسرن ظهرها
هم ماتزيد تتعتع من عندهم بالمره

والله يعطيك العافية يامن خارج الحدود وتطلعنا على كتابات السيد غلط الصحّ

 

 

الطلاق ابغض الحلال عند الله عزوجل ولكنه في النهايه حلال

وياحيف والله على الرجال اللي زي كذه واللي انتشروا بشكل واضح .. حتى وان كان موظف ياكل راتب زوجته كله والله ماهي مشكله اذا كان يبني او بيشتري لهم شي ينفعهم لكن !!!!

واقع مرير نعيشه والله يعدل الحال

شكرا للناقل والكاتب

تحيتي

زهرة السوسن

 

 

انا ارى يا من خارج الحدود ويا سيد صح ومن يقرأ لا يهون :
ان يُبعث حكم من اهلها واقترح ان يكون ابوها وحكم من اهل الزوج وليكن ابوه ويجلسان مع البنت اولا يهتلون السفرة كاملة يعني يسألونها عن حياتها مع زوجها بالتفصيل من جميع الجوانب ثم ينتقلون عند الزوج ويشوفون وش عنده ثم يواجهونهما بما يرون فلعل للزوج عذر وانتم تلومون انتم لا تحكمون من طرف واحد اتركوا فرصة للحكمين يشوفان وش عند الرجال ثم احكمان وفق ما يتوصلان إليه .
هذا رأيي وسلامتكم .

 

 

حل ابوسامي في ندف امها كل ماندفت بنته شور طيب اذا كان العريس من قرابتها وكانت هي السبب في هذه المنادفة التي اوقعت بنتها فيها وندفة بندفة ولكن لو يسمع شوري مال بنته ماكول ماكول ياخذها عنده في البيت ويحقق بذلك مطلبين ، بنته عنده الا ندفها خايب الرجا يختلص لها بالمشعاب ويلحقه بامها يندفها لين يقوم حمار بطنها ( قولولي وش يعني حمار بطنها ) ولا خرج خطيبها يتصرمح الا آخر الليل يخليه يبيت على الرصيف ولا يروح المسيد ادفى له وبذلك يعيد تربيته من جديد ذرى المره ، وهو لوكان ابوه عرف يربيه ماكان هذا حاله ولكن شور ابوه في راس المره ياسيد غلط اقولك الله يعينه على بلواه اللهم ياكافي اللهم لاتبلانا بما بلاه وين ما تلقي بها ريحتها خايسه .

 

 

المشاركة الأصلية كتبت بواسطة عبدالحميد بن حسن

انا ارى يا من خارج الحدود ويا سيد صح ومن يقرأ لا يهون :

ان يُبعث حكم من اهلها واقترح ان يكون ابوها وحكم من اهل الزوج وليكن ابوه ويجلسان مع البنت اولا يهتلون السفرة كاملة يعني يسألونها عن حياتها مع زوجها بالتفصيل من جميع الجوانب ثم ينتقلون عند الزوج ويشوفون وش عنده ثم يواجهونهما بما يرون فلعل للزوج عذر وانتم تلومون انتم لا تحكمون من طرف واحد اتركوا فرصة للحكمين يشوفان وش عند الرجال ثم احكمان وفق ما يتوصلان إليه .

هذا رأيي وسلامتكم .

معليش استاذن كاتب الموضوع للتوضيح للاخ عبدالحميد

ابوه مفاتيحه ماهي معه مايسمع الا كلام مرته ومرته ماعندها الا ذا الولد وتشوفه احسن من بن سعود

يعني الاب مامنه رجا والام زي ماتشوف ولدها احسن من بن سعود

 

 

المشاركة الأصلية كتبت بواسطة زهرة السوسن

معليش استاذن كاتب الموضوع للتوضيح للاخ عبدالحميد



يعني الاب مامنه رجا والام زي ماتشوف ولدها احسن من بن سعود

شكرا زهرة السوسن على التوضيح وكلامك منطقي 100%
وليس شرطا أن يكن الحكمان هما الابوان ورأيي ليس هو الصواب الذي يجب الاخذ به وإنما هو مجرد رأي يحتمل الصواب والخطأ .
والامام الشافعي رحمه الله يقول : ( رأيي صواب يحتمل الخطأ ، ورأي غيري خطأ يحتمل الصواب )، لكن الفكرة الا نسمع من طرف واحد بل نسمع من الطرفين ، وكيف يتم ذلك لا يتم ألا بواسطة الحكمين ، وذلك تنفيذا لاوامر الخالق سبحانه وتعالى حيث قال :
في سورة لنساء - الآيــة 35 ( وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِّنْ أَهْلِهِ وَحَكَمًا مِّنْ أَهْلِهَا إِن يُرِيدَا إِصْلَاحًا يُوَفِّقِ اللَّهُ بَيْنَهُمَا ۗ إِنَّ اللَّهَ كَانَ عَلِيمًا خَبِيرًا)
فمن منطلق هذه الآية لا بد من بعث الحكمين .
شكرا زهرة السوسن على حسن الحوار والنقاش وفقك الله .

 

 

المشاركة الأصلية كتبت بواسطة عبدالحميد بن حسن

شكرا زهرة السوسن على التوضيح وكلامك منطقي 100%

وليس شرطا أن يكن الحكمان هما الابوان ورأيي ليس هو الصواب الذي يجب الاخذ به وإنما هو مجرد رأي يحتمل الصواب والخطأ .
والامام الشافعي رحمه الله يقول : ( رأيي صواب يحتمل الخطأ ، ورأي غيري خطأ يحتمل الصواب )، لكن الفكرة الا نسمع من طرف واحد بل نسمع من الطرفين ، وكيف يتم ذلك لا يتم ألا بواسطة الحكمين ، وذلك تنفيذا لاوامر الخالق سبحانه وتعالى حيث قال :
في سورة لنساء - الآيــة 35 ( وَإِنْ خِفْتُمْ شِقَاقَ بَيْنِهِمَا فَابْعَثُوا حَكَمًا مِّنْ أَهْلِهِ وَحَكَمًا مِّنْ أَهْلِهَا إِن يُرِيدَا إِصْلَاحًا يُوَفِّقِ اللَّهُ بَيْنَهُمَا ۗ إِنَّ اللَّهَ كَانَ عَلِيمًا خَبِيرًا)
فمن منطلق هذه الآية لا بد من بعث الحكمين .

شكرا زهرة السوسن على حسن الحوار والنقاش وفقك الله .

ملاحظه

اخي عبدالحميد

اعتذر لك فـ انا لم اقل بانك اخطأت ولكن انت اعطيت رايك بان يكون ابواهما هما الحكمان مع انهم فعلوا ماتفضلت به واستدعى والد الفتاة والد زوج ابنته

بالعكس رايك عين الصواب ولكنه موجود بالقصه واحببت ان الفت نظرك له لا اكثر .. والغرض هنا هو رؤية حلول اخرى ..

وانا ايضا اشكرك على رحابة صدرك (ولكني لم اقل ان ماقلته كان خاطئ)

اكرر اسفي لكاتب الموضوع وللاخ عبدالحميد

وشكرا

 

 

اذا كان رب الدار بدف ضارب فشيمة اهل الدار الرقص الاب الله بلخير والام مشكا علي الله والولد ماشي هيله لاعمل ولا ادب ولا اخلاق ولا خوف من الله لوانا اب البنت كان خذت البنت عندي بعد مااندفه واخترج الاول والتالي واندف ابوه معاه عشان يعرفو ان بنات الناس مهمب لعبه ويغدي يشتغل ويعيش من فيده ماهو من شقا غيره هاذا علمي وسلامتكم