ماحد معه سلف؟

لوتنكسني على راسي ياعلي فرحه ماندر من جيبي ربع ريال من ذاك المدور اللي ماحد يستخدمه حتى في تلفون العمله زمان حوشنا لنا قرشين من الراتب طوال السنه ويوم جت الصيفيه جت الكهله والاولاد والبنات وهبّوا فيه وقالوا نبغى نفصّل للزواجات ونتفوا مامعنا ويادوبك فقنا الا وجاء رمضان وخلّص على الباقي والحمد لله ان الكهله وعيالها وافقوا مايشترون ملابس للعيد وعيدوا في ملابس الزواجات والا كان باقي لاذلحين صيام قبل العيد قلت للكهله اسمعي يامره بناخذ لكل واحد من السفان شنطه عشان يسرح بها اول يوم ان كان مامغطوا الاجازه على قول (سماء) وان كان مغطوها الى اجازة اليوم الوطني ويجي الراتب فاهم بيسون فينا خير ومن بعد العيد لاجت الساعه 9 وقت الاخبار التفينا عند التلفزيون كنا نحل مسابقة في حرى يمغطون الاجازه مامغطوها المهم الحمد لله انا شرينا شنط للسفان امرنا لله سرحوا اول يوم وعوّد كل واحد منهم بورقه تقول كنها ورقة الشركه زمان دفاتر واقلام ومراسم وكلها تهون مع طلبات البنات تفصيل وتدبير وتجميل وتكحيل والمدرسه كما البرميل ولكن انا مافقع مرارتي الا كتب التبسيط تبسيط الرياضيات تبسيط العلوم تبسيط الانقليزي تبسيط التبسيط طيب ياخي بسطوا كتب الحكومه وريحونا من المصاريف واخر اصدار في التبسيط بعنوان (تبسيط البنقالي في عمل الشاهي الحالي) رحت المكتبه عند عثمان ( عثمان هذا زول يبيع بالمكتبه) سلام يازول هلا بيك قلت نبغى هذي الطلبات لكن مامعك دراهم الا آخر الشهر الى استلمنا الراتب قال ابشر يازول قلت طيب ياعثمان وشنهو هذا الشريط المدور اللي في ايدك كنه شريط حجاب زمان يوم كان يغني قال هذا تحزير الدروس يازول قلت اش تحزير قال تحضير بلغتكم قلت لمن قال للمدرسين قلت ليش قال من شان يريحوهو قلت كيف قال بس يحطوهو في الجهاز ويطبعوهو ويعطوهو المدير يوقعوهو قلت طيب والمدرس والمدير يفهموهو قال ماداري يازول عليك الله ماتبلشنا دارين نترزق الله تدرون وين المشكله الراتب الجاي بيوافق اليوم الوطني يعني انصرف قبل مايجي وبرضوا على المدرسه وبعد اليوم الوطني تبدأ تفكر في ضحية العيد الطلي وصل 1500ريال يعني يادوب تزبط الامور من بعد شهر صفر عزالله قعد بها عثمان السوداني ماحد معه سلف يالربع وارده له في شهر رجب والا انا غلطان؟

منقول للكاتب الساخر ( السيد غلط) موقع ومنتديات العقشان

 

 

هههههههههههههه
ضحكتني أخي العزيز من خارج الحدود
وهذا هوحالنا جميعا نسأل الله أن يصلح
الحال والأحوال تقبل مروري ودمت بوود0

 

 

.

*****

الحمد لله انفكيت من المدارس ومن طلباتها

أنا ماودي يمغطون الاجازه ولو ان الزحمه تخف لكن خل المدرسين يشتغلون ويا ليت وزارة التربيه تقرر اليوم الدراسي الكامل عشان بعض الناس يجرب الدوام الطويل

تحياتي للأخ الكريم من خارج الحدود ولكاتب الموضوع (السيد غلط) ولمنتديات العقشان التحيه

*****

 

 

لك خالص الشكر والتقدير اخي من خارج الحدود وإن كنت في سويداء القلب ولست خارج الحدود على نقل هذا الموضوع الساخر الهادف والذي اشتمل على مواضيع في غاية الاهمية ومنها الاسراف والمبالغة في اسعار فساتين الزواجات والعيد وهد حيل رب الاسرة بكثرة مصاريفها وكذلك طلبات مدارس البنين والبنات وتمديد الاجازات رغم طولها وكثرتها وكذلك موضوع في غاية الاهمية وهو موضوع تبسيط المناهج والتحضير الصوري للمعلمين وسلبياته وجميع ما اشتمل عليه المقال الساخر الرائع .
شكرا لك اخي الحبيب من خارج الحدود وكثر الله من امثالك وتقبل خالص تحياتي وتقديري .

 

 

الاخوه الكرام سرني تواجدكم شكراً لكم على المرور