اريتريا .. تقرير مطول

السلام عليكم

في شعبان الماضي كنت اتمشى بالشيخ قوقل كالعادة

وطحت بالصدفة بموضوع عن ارتيريا
اذكر اني كتبت موضوع ايامها عن اقتصادها , بس تراني عجاز مافيني من دور الرابط وجابه , اللي يبيهه الله لايهينه يدوره ولايدور بالشيخ قوقل وبيلاقي احسن منه
بعدها لقيت نفسي انشد لها كدولة وابحث عن اي معلومات عنها , خاصة اني تقريباً ماخليت محل باقصى الشرق ولا الغرب <<< اخس يالرحالة بن بطوطة
وهذي حذفت عصا جنبي , قلت يابو يزيد مابدهاش انقز استكشف الديرة وتمش واللي عليك بالخير , اقلها تقارن بينها وبين اثيوبيا اللي زرتها من ثلاث سنوات تقريباً
لفلفت بالشيخ قوقل واخذت معلومات اكثر عنها
سئلت عن سفارتها واذا كان لابد من فيزة , وتسهلت لهم ببداية رمضان
راجعت السفارة وكانت بحي المعذر بعد تقاطع التخصصي مع خريص غرباً
اعطيتهم الجواز وباقي طلباتهم الساعة تقريباً 11 صباحاً , وقالوا تعال الساعة 2 وتلاقي الفيزة جاهزة , اذا ماني ناسي كانت الرسوم 225 ريال
بعدها توجهت لمكاتب السفر والسياحة , ولا لقيت اي خطوط تروح لها من الرياض غير اليمنية , على كلامهم كانت السعودية تسير رحلات سابقاً ثم توقفت , وايضاً كانت ناس وتوقفت ولا ادري ماهي الاسباب
بالعافية لقيت حجز وكان بتاريخ 23 رمضان درجة اولى بالذهاب وضيافة بالرجعة , السعر للتذكرة اعتقد كان 1800 ريال للسياحي , بس اصفقوني 2905 علشان الاولى من الرياض لصنعاء
الغريب ان الفرق بين صنعاء واسمرة عاصمة ارتيريا كدرجة اولى 5 ريال بس
لأني قلت للموضف يحجز لي الرياض صنعاء درجة اولى بما ان مافيه حجز الا عليها , وحجز الروحة كلها اولى , ويوم سئلته ليش قال الفرق 5 ريال فخذها اولى كلها ! قلت توكلنا على الله قصها
قبل السفر بايام اتضح لي ان احد الاخوان من الجنسية الارتيرية واعرفه من فتره طويلة موجود هناك , اتصلت عليه وخذيت باقي المعلومات عن كل شيء , وقلت له يحجز لنا فيلا بدلاً من الفنادق لأن فنادقهم كلها خمس نجوم بالسالب اللهم فندق الانتركونتننتال <<< اتحداك تعيد اسمه خمس مرات
هو الوحيد اللي خمس نجوم بالموجب , طبعاً تغير اسمه بعدين الى اسمره بالاس حسب مافهمت من سنتين لأنهم كانوا ياخذون على الاسم 50% من الارباح .
وهذي بعض المعلومات عن ارتيريا
تقع مقابلة لمضيق باب المندب الله لايضيق علينا , يحدها شرقاً البحر الاحمر وشمالاً وشمال غرب السودان وغرباً اثيوبيا وغرب جنوب ايضاً اثيوبيا ومن الجنوب جيبوتي .
مساكين حياتهم كلها استعمار , سيطرت على شواطئهم الشرقية الدولة الاموية ثم العثمانية بالكامل اللتي بدورها تنازلت عنها للخديوي باشا ثم استعمرها البرتغاليين ثم الايطاليين وبعدهم البريطانيين وآخرهم اثيوبيا <<< كل ٍ يتشاوى قسمه فيهم
حتى حصلوا على استقلالهم عام 1993م
رئيسهم اسياس افورقي , وشكله متأثر بالحكام العرب جيرانه , من استقلوا والكرسي معجبه وحالف مايتركه لأحد غيره ! طبعاً مقصوف العمر مسيحي
الدولة تعتبر من افقر الدول بالعالم , ويعمل 80% من السكان بالزراعة والرعي
يبلغ عدد السكان 4,750,000 اربعة مليون نسمة , اعتقد اغلبهم برى ارتيريا مهاجرين بسبب الفقر
تبلغ ميزانية الدولة كإيرادات 257,000,000 مليون دولار ! والمصروفات 424مليون ! اللاعب ميسي اغلى من ميزانيتهم !!
عملتهم النقفة ويعادل الريال 11 نقفة بالسوق السوداء , وبالبنك يعادل الريال 4 نقفة ! الا يا صارف من البنك
معدل الرواتب 500 نقفة يعني 45 ريال تقريباً !
يعني الشغالة تشتغل برمضان عندنا بـ راتب 2500 ريال كأنها اشتغلت بديرتها 4 سنوات متواصلة !!
الشعب جداً طيب وحبيب وكل واحد في حاله
حسب مافهمت ان ارتيريا تتكون من 12 قبيلة منهم قبيلة الرشايدة ويتواجدون بمدينة مصوع على البحر الاحمر كأكثرية هناك
بالمناسية هجرة الصحابة رضي الله عنهم للحبشة كانت عن طريق مدينة مصوع
الديانة الاسلام والمسيحية , واللغات كثيرة واغلب من يتكلم عربي بشرق الدولة تحديداً على سواحل البحر الاحمر ..
نجي الان للصور
بالبداية الصورة الاولى مالها دخل بالتقرير, لا من قريب ولامن بعيد
بس كنت ادور بدروج ورفوف وكراتين كمبيوتري علشان اطلع الصور لكم , ولقيت بالصدفة صورة حشاشة قلبي , البنت الامورة العسولة الشطورة
يوم شفتها قلت بيني وبين نفسي والله يابنيتي ما بصورهم وديرتهم اغلى منك
بحط صورتك اول صورة <<< يسمع بالمثل اللي يقول اخطب لبنتك ولا تخطب لولدك , يعني نقدر نسميها تسويق احترافي
بسم الله هذي صورة القمر
ترى مانت خسران شيء لو قلت ماشاء الله

توجهت للمطار حيث الرحلة في يوم 23 رمضان الساعة 4,45 عصراً الاقلاع

متجهة من الرياض الى صنعاء على الخطوط اليمنية

اول ماركبت الطيارة جيت مدرعم للمقعد A1
ولاقي ذاك الشايب اللي متكي بالكرسي وعلى رقبته ربطة وآثار طق ودبغ مبرح , بالعربي الرجال معفوس وشكله ماكل علقه قوية
وقفت هنيهة << متعوب عليها والله
احترت اقومه ولا لا ..
وشوي الا يوم تخاطفوني الجن والعفاريت مدري وش السالفة
قرب واحد وصار بيني وبينه بالنص قال تعال هنا, ويحطني بالكرسي اللي بعده
قرقعت بقلبي وتعوذت من ابليس , ياولد خلاص شايب وانت صايم مشيها بئه مادئش , وماباقي على المغرب الا شوي
جلست ومديت كراعيني عزكم الله وغفيت شوي
وتصحيني وحدة ملقوفة , قالت مفطر ! قلت لا وش فيه
قالت ابد بس علشان المرطبات
المهم لاحظت كل شوي يجي واحد ويسلم على الشايب العايب اللي خذا مكاني جعله مايتهنى فيه
واحد ثنين عشرة عشرين ! حتى الكابتن بشحمه ولحمه خلى الطيارة تلعب بالسماء وحظر يسلم على راسه ويديه !
يوم قربنا ننزل وربطنا الاحزمة قالوا افطروا
افطرنا قبل الهبوط بدقيقتين بالضبط
نزلت الطيارة واللي علينا بالخير , وشوي قالوا الطيارة بتوقف بس لاينزل احد !
بالفعل وقفت وفتحوا الباب
وعينك ماتشوف الا الكميرات والفلاشات والعسكر وناس طالعة وناس نازلة
اثاري الدربكة كلها طلعت علشان الشايب , طلع طويل العمر رئيس مجلس الوزراء اليمني علي مجور مدري مقور
كان مصاب مع علي صالح ويادوب طلع من المستشفى
الربع طولوا باستقبل وودع , واخذ الركاب الفضول وقاموا ينزلون شوي شوي حتى مابقى غيري بالطيارة
شوي ويطلعونهم كلهم للطيارة الا طويل العمر وحاشيته
وجلست الطيارة تمشي على المدرج يمكن ربع ساعة , يدريك انهم نزلوه بعيد عن الصالات
وبما ان الرحلة ترانزيت انطقيت الى الساعة 10 مساء حتى جاء موعد الرحلة الى اسمرة
ركبنا واقلعت الطائرة ووصلت الساعة 12 تقريباً منتصف الليل
اول ماوصلنا رحت للعفش وخذيت شنطتي ومريت السوق الحرة
يوم دخلت السوق الاهو اصغر من بقالة ابو محمد << بقالة بالحي صغيرة 4في 5متر
وفيه فراش وبطانية للموظفتين يتناوبون النوم فيها والله اعلم
شريت بعض الاغراض ويحطونها في كيس من قماش !! مثل كيس الدقيق
اتضح فيما بعد ان ارتيريا كلها مافيها اكياس بلاستك نهائياً ! وكل الاكياس لديهم عبارة عن قماش يفصل ويخيط مثل بيت المخدة ! باحجام مختلفة
وكل ماحبيت تتسوق تاخذ كيسك معك او تشتري كيس جديد !!
ونا على وشك الخروج من المطار الا وشوف الناس متجمعين حول طاولة
عرفت فيما بعد انهم يسجلون مامعك من الفلوس , وياويلك وسواد ليلك لو جيت طالع من عندهم ولا جبت مايثبت انك صرفت فلوسك من البنك !
عرفت لهم وحط فلوسي كلها بالشراب عزكم الله ولا خليت الا طفسه يسجلونها
انتهيت منهم وجيت طالع
ادور الخوي مالقيته مع اني قايل له موعد الوصول
طلعت تلفوني بتصل عليه , طلع موبايلي مايشتغل عندهم بتات البته !
طبعاً استانسوا حقين الاختلاسات << حتى انتم ماتشتغل تلفوناتكم هناك
مافيه الا شركة وحدة اللي تشتغل اكيد ماباقي الا هي عرفتوها << للأسف شركة الاتصالات الارتيرية بس !! يعني حتى حقين زين مايشتغل
ياوالله الورطة شلون الاقي العلة , لاهو موجود ولا التلفون يشتغل
رحت لحقين التكاسي ابي تلفون بشيمة ولا بقيمة
عربي مايتكلمون , انقليزي برضه مايتكلمون ويادوب يفهون علي وافهم عليهم
اعتذر واحد ان تلفونه مافيه شحن , والثاني قال الرقم خطأ , واثاري مضعوف المترس ينقل الرقم من جوالي بالمفتاح الدولي يوم كلمت خويي من اليمن
قفلت معي وعزمت اروح للفندق , وتوني باركب التكسي الا طويل العمر يوصل
وينك قال من اليوم انتظرك بالكفيتيريا ! ونا وش دراني انك بالكفيتريا يالخبل
المهم ركبنا ورحنا للبيت , ولقيته ماخذ ذيك الفليلة الحلوة

كانت الصورة بالاعلى من الخارج
وهذه الصورة من الحديقة بالحوش

كان سعرها تقريباً 800 ريال طول السفرة
هناك على فكرة ما يأجرون باليوم , لازم تاخذ شهر او تدفع حق الشهر كامل
حتى ولو ماراح تجلس الا يوم او يومين
لذلك بالمدة القصيرة يفضل طبعاً الفندق
ريحنا بالفله شوي وزبط الخوي والشغالة السحور
واسمع صوت المزعج هذا قريب من البيت

الصورة هذي خذيتها له يوم اصبحنا
شوف كيف عايش وسط العشب , لاشعير ولا قراطيس ! قال بلدي قال
قلت للخوي شوف , انا رجال ما احب الازعاج , واللي يزعجني اذبحه وآكله !
فهمها الخوي ويوم اصبحنا شراه من الجيران بـ 150 ريال تقريباً
ذبحناه وافطرنا وتعشينا وتسحرنا عليه , بالعافيه علينا
اليوم الثاني بديت استكشف المدينة
ومريت بندتهم وكارفورهم وعثيمهم وهذي صورتها

البقالة هذي حصلي معها موقف غريب
شريت مرة بيبسي من عندهم بعشرين نقفة
اليوم الثاني مريت وشريت برضه بيبسي وطلعت عشرين بعطيها البايع بالمحل
قال لا ثلاثين ! انا شكيت قلت يمكن امس كنت شاريها بثلاثين
اليوم الثالث جيته وشريت ببسي وطلعت الثلاثين قال لا خمسين !! عمى يعميك يالثور
وش السالفة مدري , بعدين عرفت من خويي الارتيري ان الببسي يأتيهم من السودان ! فإذا جاهم الموزع يبيعونك بعشرين سعره العادي , فإذا تأخر الموزع وقلت الكمية عندهم بدأو برفع السعر , وكل يوم يتأخر الموزع يرتفع السعر اكثر واكثر !!
حتى يأتي الموزع من جديد فتعود الاسعار لوضعها الطبيعي !!

الصورة بالاعلى لشارع مخصص للمشاه فقط !
فإذا معك سيكل الله لايهينك انزل منه ودفه لين تتعدى الشارع هذا
وهذي صورة لشارع العليا عندهم

اما محطات البنزين فأمرها غريب
اذا عبيت قام العامل يعصر لك اللي ! بمعنى يرفعه من فوق من عند المكينة حتى مايبقى باللي ولا قطرة !!
مثل كذا

الشيء الثاني
اذا تبي شيء من السوق لازم تشتري اغراضك بدري
لأنك يستحيل تلاقي محل فاتح بعد الساعة 8 مساءً !
خلاص 8 بعدها الله يعينك تنتظر لليوم الثاني
مايفتح بعد الوقت هذا الا محلات الدشرة والصياعة
يعني لابقالة ولامحطة ولاصيدلية ولاغيرها
على ذكر الصيدلية
توقع تلاقي بصيدلياتهم كل شيء بإستثناء الدواء والعلاج !!
واذا فيه ادوية فهي محدودة جداً جداً ! يمكن حتى البنادول ماتلاقيه
....................

باليوم التالي بدأت بإستكشاف العاصمة اسمرا , فركبت تكسي بصحبة الخوي وتوجهنا لمركز المدينة وشارع كمشتاتو تحديداً

كانت وسائل النقل المتوفرة لديهم على ثلاثة اشكال داخل العاصمة
الباصات والتكاسي , وتنقسم التكاسي لقسمين
الباص بسعر 5 قنفة من اول المدينة الى اخرها وتعادل القيمة نصف ريال او اقل !
التكاسي نوع بـ 10 قنفة وهو ما تركب معه ومعك بعض الركاب الاخرين , بمعنى يشيلك ويشيل غيرك معك , وقيمته اقل من الريال الواحد
والنوع الثاني من التكاسي اسميهم عيال العز !
لأنه واقف باماكن محددة مايتحرك حتى يجيه الزبون , وسعره 50 قنفة تقريباً تعادل 4,5 اربعة ريالات ونصف , وهذا يوصلك وين ماتبي داخل المدينة وبدون مايركب احد غيرك
هذي صورة لشارع كمشتاتو اشهر الشوارع لديهم ومركز المدينة

وهذي صورة للباصات لديهم
وتتضح الزحمة بداخله , يستحيل يمشي وباقي فيه مكان لشخص اوشخصة جلوساً او وقوفاً , ومع ذلك لايوجد لديهم سرقات اطلاقاً , لأنه ببساطة لو احد الركاب انسرق , الباص كله يروح باللي فيه لقسم الشرطة للتحقيق !
وبما ان الدعوى فيها قسم وتحقيق ومرمطة وممكن نوم بالسجن حتى يلقون السارق , قضوا على النشالين والحرامية , يعني من الاخر مش ممكن تسمع واحد يصيح مثل المصارية ويقول انا اتسرئت يارقالة ..

على جنبات الطريق توجد المحلات بمختلف اشكالها

واكثر المحلات لديهم محلات القهوة , يمكن الشارع هذا فيه اكثر من عشرة مقاهي , شعب يحب الجلسة والسوالف والقهوة , احس ماوراهم شيء فاضين
وبمنتصف الشارع توجد كنيسة الكاتدرائية والمبنية قديماً بزمن الاستعمار الايطالي , وخلفها داخل الحي بمسافة 300متر تقريباً يوجد مسجد الخلفاء الراشدين
هذي صورة للمسجد
وبتلاحظ بالمنتصف مدري مودماني ولاجني مسرع
مانتبهت له الا بعد ماوصلت البيت

وهذي صورة الكنيسة
الكاتدرائية على شارع كمشتاتو

مع التمشية بيوم من الايام لاحظت الحجة هذي تبيع لوز مشوي !!

ريحته تخليك توقف وتطلب منه غصب
شفتهم كذا مرة وكان نفسي اشتري منهم على الاقل كنوع من التجربة
وهذي صورتها

بعد ماصورتها وهي تشوي اللوز
حبيت اقولها اني صورتك مخافة اني تعديت على خصوصيتها
لأني اصور بالايفون وماتدري انه يصور
وبالفعل مجرد ماقلت لها اني صورتك وانتي ماتدرين ياحجة زعلت وبرطمت
وتقوم تسبسب زعلانه , قلت حصل خير تبيني امسحها مسحتها ولايصير خاطرك الا طيب , قالت ايه امسحها , طبعاً المترجم الخوي
ويادوب بمسحها وهي تلعلع قلت للخوي هي وش تقول ؟
قال تقول ورها الصورة و المفروض انك قلت لها قبل التصوير علشان تزبط حالها وترتب نفسها
قلت قلها تبشر يالله جهزي نفسك وبصورك ياحجة
توقعت انها بتروح لمحل كوافير ولا للعيادات التجميلية بتشد شيء ولا بتنفخ شيء
قامت ولفت البلية اللي على راسها وقالت صور !
وانتصبت كما كليوبترا
وهذي الصورة بعد ماتشيكت على الاخر
عموماً تراني مستأذنها اني بحط صورتها بالتقرير بالنت , وكانت مبسوطة

من الملاحظات عندهم الموية

الموية عندهم شيء ماهوب صاحي , عمري ماذقت ماء بحلاوته وطعمه
تشرب تشرب ماودك توقف
طبعاً لأنه امطار وعلى مدار العام عندهم بعض الانهار الجارية
من الفقعة وكثرة الماء عندهم تلاقي ببعض الشوارع ماصورة مفتوحة
للشرب والغسيل والوضوء , ايضاً لاحظت شبكة تصريف السيول شيء خيال
المطر 24 ساعة واذا وقف ماتلاقي قطرة بالشارع بعد خمس دقايق
اعتقد يبي لنا 50 سنة بالرياض حتى نصل الى شبكة مثل التصريف عندهم
اما اهل جدة فاعتقد يبيلهم 49 سنة ضوئية !
هذي صورة لواحدة من مواصير الموية المفتوحة بالشارع

من الملاحظات ايضاً الهدوء

عندهم هدوء موحش ! حقيقة وليس مبالغة , وكنت اعاني منه
بالليل على الساعة 12 وحولها لو اذن ديك على بعد 10 كيلو سمعته ! فلا سيارات ولا مكيفات ولاشيء نهائياً
ياشيخ لو كح واحد بالحي االلي ورى حينا سمعته كأنه جنبي
ما اسمع الا صوت ازيز اذني ودقات قلبي
والكهرباء ولايوم عدى من جيتهم ماطفت ! وليتها ساعة ساعتين , ممكن يعدي النهار كله والليل بدون كهرباء عادي
اغلب المحلات والاشياء المهمة تستخدم المولدات الكهربائية الاحتياطية الخاصة

 

 

عدت للوراء لأكثر من عشر سنين عندما رغبت بإستخدام شبكة الانتر نت , وتذكرت الوضع سابقاً لدينا , لأن سرعة النت عندهم 1 !!
فكما تعلمون فإن السرعات تختلف , فبعد الواحد 2 ثم 4 ثم 8 ثم 16 ثم 32 ثم سرعة الدايل اب لدينا سابقاً 64
في اول مرة تأخر فتح الصفحة فذهبت لتجهيز الشاهي , وعدت ولم تفتح الصفحة بعد , وبالمرة الثانية ذهبت لتصليح الشاهي واخذت ترويشة , وعدت ولم تفتح الصفحة ايضاً !
وبالليلة الاخرى فهمت الوضع , فذهبت واصلحت الشاهي واخذت الترويشة وحلقت ولقيت الصفحة فتحت
بعدها عرفت الوزنة المطلوبة من الزمن لكي تفتح الصفحة
واعتمدتها فيما بعد بكل الايام



اما الحصول على شريحة للجوال
فأصعب من مراجعتك لمساهمة مجمدة ومتعثرة من 30 سنة لدينا !
وربما انحلت قضية فلسطين قبل ان تحصل على تلك الشريحة
لذلك الاستئجار من احدهم افضل واسرع ..

بالايام التالية بدأت استفسر عن كل شيء , وتحديداً عن الفرص التجارية الممكنة
فعلمت انه لايوجد لديهم وكالات معتمدة لأي شركة نهائياً !
بإستثناء وكالة تويوتا ومصنع للبيبسي اقيم قديماً ايام الاحتلال الاثيوبي
هذا المصنع انتاجه قوارير الببسي فقط , يعني مافيه غيره من المنتجات الاخرى المعلبة , حيث يستورد باقي منتجات البيبسي من السودان ..
بعد ان علمت ذلك بدأت بالاحلام والتطلعات والامنيات , وبدأت اتخيل نفسي وقد اخذت احد المباني الفخمة لأحولها لشركة كبيرة تضم كل الوكالات !
حتى اني اخترت تسميتها بشركة الجمي جفل بقشا هيدب نغا زاهد !!
صحيح الاسم طويل شوي , بس المقصود اني باخذ كل الوكالات الي عند الجميح والجفالي وبقشان والمهيدب والناغي والزاهد
هذا هو المبنى اللي خذيته باحلام اليقظة

يالله هم الخسرانين
كنت ناوي اتزوج منهم واشتري البيت هذا وآخذ الجنسية
بس مالهم بالطيب نصيب

حقيقة البلد روعة , وينقصها الكثير من الوكالات ومستقبلها ممتاز لمن لديه الصبر وحب المغامرة , ورأس المال طبعاً وتوفيق الله قبل كل شيء
ولك ان تتخيل انه لايوجد مخبز آلي اوحتى نصف آلي ! بل لايوجد حتى الخبز المفرود ولا الصامولي , فالخبز المتوفر لديهم خبز بلدي تحتاج لكسارة حتى تستطيع مضغه واكله !
علماً بأن غالبية منتجاتهم بالاسواق من السعودية ثم اليمن والسودان ..
ثم فكرت بعدها بالاغنام وسئلت عنها
فكانت الاسعار ممتازة ولكن الدولة تشترط عليك الصرف عن طريق البنوك
فإذا التزمت بهذا الشرط اصبح سعر الاغنام مواز ٍ لسعرها هنا
فبالسوق السوداء سعر صرف الدولار 40 نقفة , اما عن طريق البنك فلن يتجاوز 15 نقفة
وبناء على ذلك صرفت النظر

ثم اتضح لي بعدها بأن سعر الدجاج المجمد 17 ريال للكيلو
وسعره لدينا لايتجاوز 9 ريال , وهذا يعني انه كإستثمار ناجح لمن اراد
فالفائدة تكاد تقارب 100% خاصة ولو كان الشحن من جيزان بحراً او استوردته مباشرة من المصدر

طبعاً مافيه ولامطعم عالمي معروف
لاكنتاكي ولاهارديز ولاماكدونالدز ولاغيرها
بس الحقيقة عندهم مطعم افضل من هذي كلها بالنسبة لي
عزمني فيه الخوي للعشا وطلب اكله يسمونها فتة , اعتقد نفس الاكلة موجودة لدينا وبنفس المسمى , مدري اسمها كذا عندهم بالفعل او الخوي قرب الاسم لي , لأنه كان عايش بالسعودية ويعرف اكلنا
الاكلة هذي من بر ومرق باللحم و 6 قلابي فلفل !
اول ماتبدأ بالاكل بعد التسمية تبدأ اعراضها الاربعة شيء فشيء
اول شيء تحس بالدفا لأن الجو عندهم بارد جداً
ثم تبدأ عيناك تدمع من حرارة الفلفل
وبعدها يبدأ الانف يمشي ! ويبيلك كرتون فاين
واخيراً يدخن راسك
هذي صورتها قبل الفتك بها وهي ساخنة


وهذي صورتها
عقب ما صارت من صيد امس
قولوا ماشاء الله لاروح في خرايطها


وهذي صورتها في مطعم ثاني
بعد مادقيت فيها شوي
لأني ادمنتها عشا كل يوم





.....................................





في صباح احد الايام بعد صلاة الفجر , حاولت انام ماجاني نوم
قلت ياولد مابدهاش الكهرب طافي والجلسة ماتنفع , خذها تمشية كعابي بالجو اللي يرد الروح خاصة بعد ليلة شديدة المطر
وفعلاً لبست ونزلت اتمشى مع طلوع الشمس
يادوب طلعت ومسكت الشارع العام , إلا الناس متجمعين بالعشرات
تعرفونا يالسعوديين نحب الفضول
قربت منهم بشوف وش الهرجة , اثاري الناس متجمعين على واحد معطبها وماسكة على الرقص ! يالله صباح خير
الخال رقيص بس مامن جسم , جلد على عظم , كان ودي اصوره بس الجوال فاضية بطاريته , لأن الكهرب طافي من امس العصر بسبب المطر القوي
عموماً للتقريب دورت بالشيخ قوقل
ولقيت اقرب صورة له هذي


تركتهم واستمريت بالتمشية
وبعد يمكن كيلو وقفت امام لوحة حيرتني
اللوحة مكتوب عليها باللغة العربية ( قسم الحلات الطائرة ) انا قريتها بتشديد اللام
وقلت مفرد حلاّت حلة ! بديت افكر بالمقصود منها , هل المقصود بالحلّة الطاسة او السحلة او الصحن ؟
ثم هداني تفكيري الى ان المقصود الاطباق الطائرة !!
معقول ! يكونون سبقونا وبدأوا بصناعة الاطباق الطائرة ! لا وكاتبنها بعد شاهر يابو ظاهر , وبالشارع العام ! يعني على الاقل مثل هذي الصناعات المتقدمة تكون سرية
تعديتها ومشيت , لا خشت راسي ولا استوعبتها
ثم التفت اليها مرة اخرى وإذا هي مكتوبة باللغة الارتيرية والانجليزية , لكن اعماني الله ماشوف الانجليزي
طلع طويل العمر الخطاط قصده ( قسم الحالات الطارئة ) واللوحة على مدخل مستشفى !
ضحكت على نفسي وعلى الخطاط الافدغ واستمريت بالتمشية
حتى اعياني التعب وعدت للبيت
باليوم الثاني جاز لي الوضع بالتمشية بعد صلاة الفجر , فسلكت طريقاً آخر وابعدت كثيراً
ومما لاحظته كثرة مسايير عجايزهم , كل شارع فيه عجز يمشون , تذكرت ساعتها عجايزنا زمان , ومساييرهم بالضحوية , ربما لأن اسمره صغيرة وكل الناس بها يتعارفون ..
والملاحظة الثانية انه من الطبيعي انك تشوف البقر والجمال والحمير كرمكم الله , والكلاب والقطط وحتى القرود بالشارع ! بالذات لوكنت تتمشى بأطراف المدينة , والوضع عادي جداً وغير مستغرب بالنسبة لهم
بعد ان اعياني التعب قررت العودة للبيت
حتى وصلت لميدان الشّدة بتشديد الدال
هذا الميدان يعتبر من اهم معالم اسمره واشهرها , وهو عبارة عن دوار وبوسطه حذاء كبير اعزكم الله ! صراحة لا ادري مالمقصود به ولا على مايرمز
عموماً هذي صورته ولكن للأسف كان ذلك الوقت للصيانة

بما ان الصورة بالاعلى مابينت شيء
جبت لكم الصورة التالية من قوقل ارث
وسمعت انهم يبون يحطونه نعال كعب ابو شوكة !! مدري صدق ولا مزح من صاحب المعلومة
هذي صورته الاصلية بوضعه السابق

بعدها تعبت من المشي , قلت مافيه الا آخذ تكسي للرجعة
وقفت التاكسي وطلع مايعرف لاعربي ولا انجليزي
والمشكلة ماني عارف طريق الرجعة صح , قام يفرفر بي يمكن نصف ساعة , وكل ماسئلنا احد طلع برضه مايتكلم لاعربي ولا انجليزي
حتى رحمنا الله وطحنا بالدكتورة هذي ودلتنا

بالليل بدأت فكرة الخروج من اسمره تراودني للتمشية
فأشار الخوي بمدينة دقمحري وهي مدينة صغيرة على بعد 35 كيلو من اسمره تقريباً جهة الجنوب
ومع السوالف جت فكرة الصيد , فقال الخوي اذا تبي الصيد فبالقرب من مدينة عصب , وتقع هذه المدينة باقصى الجنوب الشرقي لأرتيريا , على مسافة 500 كيلو تقريباً من اسمره
يوجد بها الغزلان والضباء والنعام وكل مايخطر ببالك من الصيد البري
بدأنا بالتجهيز من اليوم التالي
فجهزنا العزبة واتفقنا مع اصحاب سيارتين لإستئجارها على ان يرافقونا بالرحلة
هذي صورة وحدة من السيارات

ثم اصبحنا امام مشكلة عويصة لم نجد لها حل
السلاح , لم نجد من يبيعه او يؤجره , بحثنا لثلاثة ايام متتالية ولكن بدون جدوى , ولايعني ذلك ان الناس ليس لديهم سلاح , لديهم ولكن يخافون , وحسب مافهمت ان الصيد ممنوع وعليه عقوبات شديدة
آخر المطاف قالوا مالكم إلا الرشايدة بمدينة مصوع , هم من لديهم السلاح وبدو رحل سلاحهم غير مسجل , إما باعوكم او اجروكم
فكرت بالموضوع واستخرت
ثم كنسلت الرحلة , لأن مدينة مصوع بعيدة ووجود طلبنا غير مضمون
وبنفس الوقت خفت على من معي , حتى لا اكون سبب في مشكلة لهم لاقدر الله

بدأت بعدها بانجاز بعض الشغلات الخاصة
وفي يوم العيد ذهبت لمطعم الخيمة , وهو مطعم صاحبه يمني وشريكه ارتيري , يقدم الاكلات العربية بمافيها المندي والبرمة
ذهبت اليهم صباحاً بعز البرد
وهذه صورة لجلسات المطعم الخارجية

وبما ان الجو بارد جداً دخلت بالجلسات الداخلية
وكان بجانبي شباك مفتوح
جابلي المرض من البرد
تخيل جوع على العشاء من البارح وبرد شديد

وزاد الطين بلة يوم جابو الفطور وحطوه على الطاوله الثانية قدامي
بزعمهم يبون ينزلون الطلب دفعة وحدة !
قمت اشوفه جوعان والبرد ذبحني

شوي يوم الله بيرحمني ويجيبون الخبز اللي يفوح

جابوه من هنا وقمت اقرقطه
مافيني صبر لين يجيبون الفطور

 

 

بعد العيد بمساء احد الايام اشار الخوي بفنجال قهوة من البُنة كمايسمونها بأحد مقاهيهم المشهورة , فذهبنا وتوقعت ان مقاهيهم مثل مالدينا , اقصد شيشة ومعسل
لكن تفاجأت بالخوي يقول الشيشة هنا ممنوعة ! ويعتبرونها من المخدرات , هي والقات ايضاً ! عكس الدول المجاورة اثيوبيا وجيبوتي واليمن ...
دخلنا المقهى وإذا به عبارة عن جلسات مثل المقاهي المتعارف عليها لدينا
كراسي وطاولات من الخشب والجلد الطبيعي
والاضاءة به خافته جداً , بالكاد ترى ما امامك

وهذا مكان الحجة اللي تسوي القهوة
ويتضح نوع من النباتات منثور بالمكان يشبه البرسيم او اعواد النصي البري لمن يعرفه
لا ادري مالهدف منه ولما وضع
علماً بأنني سئلت الخوي والحجة ايضاً ولم احصل على جواب مقنع
اللهم كنوع من طقوس القهوة او العادات القديمة لديهم

طلبنا القهوة وتوقعتها جاهزة
ولكن جلسنا اكثر من ساعة حتى تم تجهيزها !
قامت بالبداية بحمسها حتى عج المكان برائحتها الزكية
واثناء استرسالي بالحديث مع الخوي تفاجأت بالطيب او البخور يقترب مني
فقمت بحركتنا المعتادة بسحب الدخان بيدي إلي
لأكتشف ان الحجة جايبة القهوة بالمحماس ! حتى نعطيها رأينا بالحمسة
اما نكتفي بحمسها كما حمستها , او نطلب حمسها اكثر لو اردنا
قلت للخوي قلها تمام بس نخلص , لأنها طولت مرة
بعدها قامت طويلة العمر بطحنها , فحمدت الله ان عندهم طاحونة ولا كان جلسنا ساعة ثانية ننتظر النجر
حطت قهوتها بالبريق وقامت تطبخ يمكن نصف ساعة , ثم فرغتها بدلة تشبه الجره جابتها وحطتها قدامنا

ننتظرها تصب عاد ماصبت
اثاريهم مثلنا لازم يخلونها تركد شوي
بهذه الاثناء جابت البخور وطيبتنا , ثم وضعت البخور

بعدها صبت لكل واحد فنجال وقربت السكر ومثل القمح المحموس , قهوتهم تشبه القهوة التركية محموسة زيادة
شربت فنجالي الاول واكتفيت , قال الخوي ترى لازم ثلاثة فناجيل !
ياولد عدل بدل قال لازم ثلاثة !
واذا بتبين لها ان القهوة مضبوطة , زود فنجال ولاثنين
وفي كل مرة اخلص فنجالي تجي وتصب , ونا اقحن لين كرهوني بالقهوة

خلصنا وطلعت استكشف المقهى
واذا الغالبية متجمعين حول التلفزيون يتابعون مسلسل مصري !
هذي لاحظتها كذا مرة بارتيريا
تلقاهم متجمعين يا على كورة او مسلسل ومتحمسين بالمتابعة
مدري وش سالفتهم لاشغلة ولاعملة

على فكرة سمعة السعوديين هناك مش ولابد
بسبب شلة من زمان كانو بالسفارة قبل يمكن خمس سنوات
ماخذين فيلا وقالبينها خبيتي حسب ماسمعت
وكل يوم مسببين مشكلة
عكس القطريين لهم حظور وسمعتهم حلوة , ورغبتهم الاولى دائماً بالسفر لقطر دون غيرها
ومن المفارقات ان دولتهم تشجعهم على الهجرة ! لأنها تحلبهم صح
بأخذ ضريبة 3% من رواتبهم , وكنت اعتقد ان غالبية هجرتهم لنا بالسعودية ودول الخليج تحديداً , واذا بالاكثرية باوروبا المانيا وبريطانيا وايطاليا واسبانيا ..

على ذكر الضرايب , بيوم رحت مع الخوي نصرف من السوق السوداء
فصرفنا الريال بـ 11 نقفة , بينما سعر الصرف بالبنك 4
قلت للخوي ورى ماتاخذ الفلوس من السوق السوداء وتروح تصرفها بالبنك
بمعنى تصرف الريال بـ 11 ثم تروح تعطيهم فلوسهم وتسترد الريال بـ 4
واذا ماعندهم ريال خذ دولار بـ 15 وارجع اصرفه بـ 40 بالسوق السوداء
حاولت افهم الخال مافهم ولا استوعب , او انه فاهم ومتخوف
عموماً لو طبقها مكسبه اكثر من 100%

مع كثرة انقطاع الكهرباء , اكتشفت شموع عندهم مجنونة
اذا ولعتها تجلس 12 ساعة متواصلة ! لاويقولون لو حطيتها بالثلاجة قبل الاستخدام تجلس 24 ساعة مولعة
قلت مادام كذا خلني آخذ منها كرتون للبيت وهدايا
وهذي صورتها

ايضاً وجدت افضل انواع الجلديات بتراب الفلوس
فاشتريت وقشيت لين قلت آمين
جاكيت شاريه بـ 2000ريال , لقيت اخوه طبق الاصل بمايعادل 180 ريال !
بالاضافة للمحافظ والشنط والاحذية والاحزمة الفخمة بأسعار متدنية للغاية ..

هذه صور متفرقة من اسمره
الصورة الاولى لأحد الشوارع

وهذه صورة لنوع من السيارات لايتم الزواج والزفة إلا فيها
كنوع من العادات عندهم
يعني ممكن ينسى العروس بكبرها ! بس يستحيل ينسى يستأجر السيارة هذي
يجلسون يفرفرون فيها طول اليوم لين يدوخون

وهذي صورة لتقاطع العليا مع التحلية

وهذي صورة للفندق الوحيد بارتيريا ذي الخمس نجوم
اسمره بالاس
على فكرة لايوجد نجمة ولا نجمتين ولا ثلاث ولا اربع


ختاماً ومن المخالطة
ولعلها تصل لمن يهمه الامر
علمت ان مركز انطلاق مخالفي الاقامة من افريقيا عموماً , ومن السودان وارتيريا واثيوبيا والصومال وجيبوتي تحديداً
من مدينة سواكن بالسودان ومن جيبوتي
واذا تم تسفير اي عمالة من اي دولة ذهب الشخص للدولة المجاورة وحصل على جوازسفر جديد بقيمة لاتتعدى 500 ريال وقدم بجنسية جديدة , حتى لايكتشف امره بالبصمة , لأن تشييك البصمة كما هو معروف على الجنسية , يعني الجنسية اثيوبي يشيكون على الجنسية الاثيوبية ! بينما جنسيته الحقيقية ارتيري ! وتم تسفيره سابقاً , وهذه ثغرة كبيرة وخطأ فادح بالنظام , يجب حله سريعاً ليشمل البحث كل الجنسيات , وليس كل جنسية على حده كماهو معمول به الان !! هذا في حال رغبته بالقدوم بصورة قانونية
اما ان لم يجد تأشيرة فيكتفي بالحصول على جواز دولة اخرى , ويتم تهريبة اما من سواكن او من جيبوتي
وقيمة تهريبه الى الرياض مع الحصول على اقامة نضامية ! 1500 ريال
اما التهريب الى الرياض والحصول على بطاقة احوال نضامية 2500 ريال
اقصد بالاقامة والبطاقة النضامية , انه يحصل عليها ويقومون بتغيير الصورة فقط , يعني يشيلون صورة صاحبها الاصلي ويضعون صورة مخالف الاقامة بطريقتهم
فإذا تم التشييك برقم البطاقة او الاقامة تكون نضامية بينما الصورة تم تغييرها !!
الغريب ان المهربين لا يتقاضون شيء حتى يصل الشخص الى الرياض او المدينة المرغوبة !
محفول مكفول
فإذا وصل اتصل بمعارفه ودبروا المبلغ له
والمشكلة الاكبر ان الشخص عند تهريبه يعمل من مبدأ خاربه خاربه , فيحمل ويهرب معه كمية من المخدرات او الاسلحة

على كذا انتهت الرحلة وإن كنت اختصرتها بعض الشيء
فغادرت اسمره الى صنعاء
وهناك قابلت المجهولين من مخالفي الاقامة الذين يتم تسفيرهم لليمن ثم يعودون مباشرة بمجرد خروجهم من المطار!

العدد كبير طائرة كاملة يومياً حسب ماذكر لي موظف المطار
ولكني صورت جزء منهم بسبب وجود نساء بالجهة اليمنى
ثم التقيت بعدها بأهل موظفي شركة المراعي , القادمين من اسمره
ولسان حالهم يقول لاتسعودون الوظائف نحن احق بها من شبابكم
فزادت نقمتي على المراعي اكثر واكثر , لأني مقاطعها بالاصل , ولاهو اللي بيزود كرهي لها