كهلتي ضاقت؟

كنت راقد قلت باقيّل شويه قبل العصر شوي الا ورزعة الباب حق الغرفه قم قم قم قمت كما المجنون وشبك يامره خذتي عقلي ماشي خلاف قالت اقل قم نسيت ان شي عروس اليوم قم صل العصر وودني القصر قلت بعد بدري سمي بالرحمن قالت اقل قم بعد اتلبس واتغرز قلت يالله معونتك هيا انا باروح اصلي وخلي البنت تسوي لي شاهي لين اعود والبسي ولاتقهويت وديتك قالت هيا صليت وعودت تقهويت وعينت خير قلت مشينا ياكهله قالت هيا خذتها في ونيتي وصلنا القصر زقيت بها عند الباب وعودت البيت وعند المغرب رحت مع الجماعه القصرقاعد بعد المغرب فالقصر نسولف مع الربع ونتقهوى من ذاك الشاهي كنه مواص الله يديم النعمه شوي الا وولدي الصغير كما الصاروخ جاي سعي وطب الا وهو في حثلي قدامي فنجال شاهي كفحه فوقي قلت سكون بالولد وشبك ياسكن كسرتنا وكسرت الفناجيل قال قم قم يابه بسرعه قلت وشبك خذت عقلي قال امي عند باب النسوان تدعيك قلت امك وشبها قال مدري صاحت عليه قالت ادع ابوك والله انها ضايقه مره قلت يالله مساء خير مابعد مدى النسوان يتعشينه لايكن تعايرت مع حد قال مدري قمت وصلت عندها وشبك يامخلوقه قال ودني البيت والله مازيد اقعد قلت تعشيتم قالت تعشوك اقل ودني البيت قلت بسم الله عليه طيب خليني اجيب السياره ركبت جنبي الا وانها تزفر وعرقها يصب قلت وشبك مريضه اوديك المستوصف قالت اقل ودني البيت واهجد عني قلت طيب وصلنا البيت وعالغرفه على طول وانا وراها كني سواق اندونيسي هبدت بالشنطه والعبايه وزقت بالغراز وجهها احمر تقل قوطه قلت ياذا الليل وشبك يامره قالت وشبني ياعيباه قلت ايش بيني وبينكم قلت المره لايكن صادتني في شي حمّر وجهي حتى انا قلت بالله وشبك قالت يوم صلينا المغرب قلت اها قالت الا ودخلة ذا يجي عشر بنات ونسوان فغرت انا قالت افغروا عليه وشبك فغرت قلت طيب هيا بصمنا ايوه وشبهم قالت شرهه قلت شنهي قالت وحده لابسه الى عند ركبتها والباقي عاري ووحده لابسه بنطلون مقحّط لوحد دقها بشوكه انفشت ووحده معها كم والثاني ماشي وانا فاغر اسمع فيها ووحده عاري ظهرها كله ووحده عاري صدرها ووحده معها ذيل يسحب وراها تقل كنه سلى شاه قلت ياقوة الله من وين جو ذولي قالت من وين جو من بنات الديره سبعه والبنات يوم شطح نطح قلت طيب ويش قالت ويش تبغاني اقعد معهم والله لداخ بي راسي يوم شفتهم هذولا ماوراهم اهل ماشافوهم وهم خارجين ماشافوا لبسهم صاح الله عليهم وعلى من رباهم قلت وانتي زعلانه عشان ذا الموضوع قالت يعني عجبوك اني دريت من يوم اهرجك وانت فاغر فغروا عليك قلت لا لا معك حق وقلت بنفسي ياربي وين ذولاك ويين كهلتي هذي اللي متقحطه بتالكرته وذا المعصب وذا السروال الحلبي اللي يسحب فالحيله ولادخلت غرفتها كني بسوق الخميس عند البساطات غراز وكاذي وبعيثران وشار وحنى وسطل وزلين يشحم عشر سيارات والا المكحله كنها كأس العالم والا المرود تدخله في عينها وتخرجه ماقد فقعتها قالت وشبك سرحوا بك اعجبوك النسوان هاه قلت لالاهيا انا باعود اتعشى شرهه مالجماعه قالت وانا باغدي انخمد راسي يحمبي مدري كهلتي صح مدري ويسموني سيد غلط؟

منقول من مقالات الكاتب الساخر(السيدغلط) موقع ومنتديات العقشان

 

 

هالمره انت غلط ياسيد صح خاصة بعدما سرحك فجلك عفواً فكرك ورحت تقارن بين
كهلتك ام سروال حلبي كنه سروال غوار الطوشه وبين اللباس ابو كم وذيل يسحب والقصير
والعريان وهي هالمره صح لانتقادها جيل مايحب الستر حيث تقل الشاعرة الله يرحمها
ياسين ياصفة الدجال واتلى الزماني
الولد مايستمع لابوه لاعاد ينادي
خصوص لاقال طع ربك وصل الفريضه
يعاد بينه وبين ابوه ظلمى كما الليل
ونسيت الباقي اللي يخص البنات بازيد انشد جدتي عنه
المهم الجيل هذا في ذه الوقت فصخن الحياء الله يهديهن
ومن فصخ الحياء توالت به الحيايا وعيون الحاسدين خص الى كانت البنت هيله جهدا
والزين معونه ولكنه مايسلم من الإنتقاد ويرخص قدره بين اهل العقول الرزينة ومايفكر حد ياخذه
واما ان كانت ماهيب هيله خلقتها فيقولون ليتها استترت فحازت الوزر مع التريقه

والله تعالى امر بالستر فقد قال الله تعالى ( يا بني آدم قد أنزلنا عليكم لباسا يواري سوءاتكم وريشا ولباس التقوى ذلك خير ذلك من آيات الله لعلهم يذكرون) في هذه الآية الكريمة بين الله تعالى ما من به على عباده حيث أنزل عليهم ثلاثة أنواع من الألبسة نوعان حسيان ونوع معنوي فأما النوعان الحسيان فهما لباس ضروري يواري الإنسان به عورته يكسو به بدنه لا بد له منه ولباس ريش ويقال رياش وهو لباس الجمال والزينة الزائد عن اللباس الضروري واما النوع المعنوي فهو لباس التقوى تقوى الله عز وجل بامتثال أمره واجتناب نهيه وهذا اللباس خير من النوعان الحسيين ذلك لانه يواري سوءات الإنسان في الدنيا والآخرة يواري سوءاته المعنوية ( ومن يتق الله يجعل له مخرجا ويرزقه من حيث لا يحتسب ) (ومن يتق الله يجعل له من أمره يسرا ذلك أمر الله أنزله إليكم ومن يتق الله يكفر عنه سيئاته ويعظم له أجرا )
لك خالص التقدير ياسي من خارج الحدود على نقلك مقالات السيد صح في الزمن الغلط

 

 

ياسيد غلط

الله يصلحك
إنت وش دخلك بهذي العلوم لايكنك ماتدري إن الزمن تغير

اليوم ماهو مثل اول
لاتنسى إن البنات في مثل هذه الأعراس يجلبون انفسهم كمن واحده من الكهيل تعجبها وحده من البنات وتخطبها لولدها

علم الكهله اللي يحوم بها راسها ثاني مرّه لاتقعد تبحلق بعيونها في الكهيل خلها تنقي واحده من المفعصات والعاريات واللي معها نص كم واللي صدرها عاري لواحد من الأولاد

وإلا اقل لك
المثل يقول جت منك يامسيد

لاعاد توديها للزواجات وخلها تنسدح لين تعود انت

الله يهديك
بس بصراحه هي صح وانت غلط المره هذي

 

 

انا اقراء لنجيب نحفوظ غامد 0 سلوب شيق ولذيذ الله يبارك فيك واول ما شطح نطح صحيح والله يكفينا شر القدم تحياتي 00