أحرق المدرسه؟

يقول لي واحد من الربع ان عندهم مدرسه اولاد مستاجره فصول الطلاب كنها حققت صلصه وغرفة المدرسين بالمطبخ حتى المجلى حق غسيل المواعين باقي مكانه ببزبوزه ماشالوه قلت طيب حلو لاجاء وقت الصيف وحط المدرس عمامته من الحر يعلقها في البزبوز لأن الوزاره ماتأمن شماعات ملابس بالمدارس قال طيب شفت مدرسة البنات اللي ببلجرشي كنها مدرسه في بنقلادش قلت تبغى الحل وانا عمك قال هسلم قلت مالها الا حريق قال كيف نحرق المدرسه قلت ايوه ماشفت حريق المدارس صار موضه من يوم انحرقت مدارس براعم الوطن واللي دبسوها بالبنات وانحن كل يوم نقرأ عن مدرسه انحرقت ولاانحرق مدرسه صحيت وزارة التعليم والدفاع المندي والهيئات وجت التقارير انها ماهي صالحه يعني مايدرون عنها الا لاانحرقت قال ويغيريون مدرستنا ظنك قلت والله يغيرونها والا اقل شي يطلع اسم مدرستكم بالجريده وينبسط منك المدير لأنهم بيسوون معه لقاء ويزودك في التقرير قال طيب معك قاز قلت ليش القاز قال عشان نولع به قلت مايحتاج لو زقيت بكبريت فوق وحده من الماصات شبت المدرسه عشان الماصات حقت الطلاب من عهد جدتي يوم كانت تدرس محو أميه ويوم ضموا تعليم البنات مع السفان خلطوا حتى الماصات والا ازقب عود كبريت في غرفة المكتبه اللي مصكوكه وماحد قد فتحها حتى المدير مايدري عن مفتاحها وين هيه واشرد ولاتعود الا لاسمعت صياح الدفاع المندي النهار الثاني قال يعني ماضنك يجون بنفس اليوم قلت مايمديهم باقي يعبون الوايتات ويتلبسون وياخذون موافقه ويتغدون ويقعدون في حرى زملاهم اللي راحوا يجيبون سفانهم من المدارس ويصلون العصر ويشربون براد العصريه هم ياجونكم قال اجل خلنا على مدرستنا وجني

منقول من مقالات الكاتب الساخر(السيد غلط) موقع ومنتديات العقشان

 

 

اخي الكريم من خارج الحدود لك وللسيد غلط
كل الشكر والتقدير على هذه المواضيع الهادفه
والبناءه والتي تكشف المعاناه مع من لايخاف
الله أصلح الله الحال والأحوال لك تحيــــــــــاتي0

 

 

[ انا حقيقه دخلت بالغلط وبعد ماقريت موضوع*السيد غلط* عرفت انه صح ولكن لدي سؤال الا يخاف* السيد غلط* من هذا التحريض العلني في المنتدى وان يصبح كل حريق في مدرسه هو المطالب فيه ويدبس فيه مثل ما دبسوا بنات مدارس براعم الوطن في حريق مدرستهم اخي خارج الحدود حذره من مثل هذه الكتابه والا يعودها ولك وله الخير

 

 

مواضيعك مختاره بعنايه وتخبط على الحديد 0 البارد 0 حفظك الله 00