المسامح كريم

.

*****

قصيده بعنوان المسامح كريم
للشاعر عبدالمحسن بن سعيد
"أبو تركي"

سامح الله شبابي كم تركني أهيم= وأترك النفس تكفخ مع شرود الهبايب
غرني بالشموخ وكنت أظنه مقيم =ماخبنت الثياب ولا حسبت العقايب
وسافرات الخطايا مالقت بي خصيم= استباحت وفاحت لين شفت المصايب
وش أنا يالضعيف إلا برحمة رحيم= وش أنا يالفقير إلا لسان ووهايب
وش أنا يالذنوب إلا بعفو الكريم= وش أنا يالعجول إلا بستر النوايب
وش أنا يابن آدم غير قطر ٍ ذميم =الله اللي عمرني بين صلب وترايب
موت والموت زفره وأنتهى ياغشيم= لكن اللي ورا هالموت ....ياهو عجايب
آه .. وإن مادحرتك ياللعين الرجيم= صحت من كبر همي حدر كوم الشهايب
ويلي إن لحفوني جرهدان ورميم= وأتبكوا خمس لبنات اللحد بالروايب
ثم هل التراب وصار فوقي رزيم= شبر ٍ أو دون ما تمراه غير النصايب
آآه ..إلى رو ّحوا صوت الخطا صوت ديم= ثم روحت ياتركي تسوق القرايب
آآآآه .. ياوالله اللي صرت عقبي يتيم= والله إن مايحبك مثل قلبي حبايب
ياخلف عمري اللي راح مثل الصريم =حلل اللي عليك عروق قلبه ذوايب
وأي وإياك تبكي مثل مبكا الحريم= أبلع الحزن وأطلب ربك ومأنت خايب
ياولد من حشا مأشرك وربه عليم= لا ولا ينشده ربه قد أغتاب غايب
ماكره طول عمره لا ولا له خصيم= ولا عرف حي ٍ إلا حبه بلا سبايب
آه واليوم من شوفتك يمسي فطيم= خامد ٍ مأحتر ك .. للدود جسمه نهايب
ويلي اليوم أبسأل عن جديد وقديم= ويلي إنما كتب لي ربي أجيه تايب
يالله إن جاك عبدك ياودود وياحليم= مامعه مايوفي عنه عظم الطلايب
جاك من عقب ماخلا حياته سقيم= صابه اللي تعرفه وانت مشفي وصايب
يالله ان ترحمه من تلته للضريم= نارك اللي تلضى في شررها لهايب
يالله ولا تحرمه شوفتك ياعظيم= ماله إلا انت منجى يارفيع الجنايب
آه ياكثر خوفي منك وانت الحكيم= آه ياكثر ذلي وأرتعد منك هايب
راحت ايام عمري ماعرفت النعيم= مجهد النفس لكن مالحقت الركايب
رحت وأجمل حياتي ضحك طفل ٍ وسيم= رحت وأقسى حياتي دمعتين ٍ لشايب
رحت وأحلى المرابي من حرض للقصيم= رحت وألذ عمري حدر فيّ السحايب
سامح الله شبابي والمسامح كريم= وسامح الله زمان ٍ مايلم الحبايب

للجميع خالص تحياتي

*****

 

 

وسامـح الله زمـان ٍ مايلـم الحبايـب

تسلم
عبد الرحيم
على النقل المميز ..
تقبل مروري
لاخلا ولاعدم..
تحيااااااتي ...

 

 

يالله إن جاك عبـدك يـاودود وياحليـم
مامعه مايوفـي عنـه عظـم الطلايـب
جاك من عقـب ماخـلا حياتـه سقيـم
صابه اللي تعرفه وانت مشفي وصايـب
يالله ان ترحمـه مـن تلتـه للضـريـم
نارك اللي تلضى فـي شررهـا لهايـب
يالله ولا تحرمـه شوفـتـك ياعظـيـم
ماله إلا انت منجـى يارفيـع الجنايـب

طرح رائع 000 تقبل مروري ابا توفيق

 

 

سلمك الله اخونا عبدالرحيم نقل رائع وقصيده في روعتها
تقبل كل تقدير ...