قصة اصحاب السفل

طيب يالمهاتما حاضر آمر وتدلل ونزولا عند رغبتك ولو اني ماخذ على خاطري منك خذ الجزء الثاني
ولا تقعدى تنخش ورا مواضيعي ما ني فاضي ...

قبل نبدأ في السالفة احب اشكر اخي المهاتما بس حبيت امزح معاه واشكر كل من مر على هذا الموضوع والذي سبق وان بينت انه منقول وبتصرف ...

الجزء الثاني من (أصحاب السفل)

تنحنحت البقرة والتفتت اليهم قائلة: تبايتوا,وتحمدوا الله,ترى لو تركونا يوم واحد ,تقسمتنا السباع ظهيرة النهار.وأنتم تدرون, كم نحن محسودين وكل صاحب نعمة محسود ,ومطموع فينا.

الحمار-- صادقة والله ,معك حق ,وش ذا النعمة الي انت عايشه فيها حتى يحسدونك والله انك ماخذه مقلب في نفسك .. صحيح انهم يعزّونك أكثر من أولادهم,تعيشين في رفاهية وراحة ما يحلم بها اغناهم, يعني ما بقي عليك الا المكحلة ,والصمادة,وتصبحين واحدة من أهل البيت, على قولهم لجل عين تكرم مدينة لكن المصيبة لو جف ضرعك وانقطع الحليب ,ستعرفين قيمتك الحقيقية. يام العيون الوسيعة .. سبعة والعيون ..

البقرة-- انا مالي الا الظاهر ,وليش استبق الاحداث, انت ما سمعت الشيبة في عيد الام يوم امتطى خشبة المعلف وخطب في عائلته وقال عن كهلته( صحيح هذه أمّكم ,ولكن البقرة أمنّا كلنا) باقي تبغي اثبات غير هذا ؟انها شهادة اعتز بها, وبعدين حتى لو بغيت امنع الحليب عنهم وش الفائدة ؟,شفت عندي مصانع للا جبان!!, ابوهم يقعد مكانه وانا سأموت جوعا وظمأ وسأفقد الحماية والمأوى. يعني شيء مقابل اشياء ,والحياة تعاون وتكافل.وانت يالحمار معروف عنك أنك ترفس النعمة,حتى ولو فرشوا لك الارض كلها نجيلة,تتركها وتروح تدور للمراغة!!. قال ايش : قال اتمرغ ...

الحمار-- والله إنك تعيشين في غفلة ,شفتي ذيك الكهلة اللي تقرأ عليك الفاتحة ,والتحيات,بكرة وأصيلا, وتنش عنك حتى الذبان ,وفي الربيع وفي ذيك الدينة تلبسك بحوكتها ... والله إن أنقطع الحليب انه بتتحول كل تلك القراءات والخدمات خمسة نجوم الى مناذير منذار في ذنب منذار, يعني بدل ما تسمي عليك, ستسمعين مصطلحات جديدة ( نفروا بك ,دخلوا من جنبك,من ايديه في أيديهم آهي لكم )وعلى كل المقامات : مقام البنجكة مقام السيكا وانت ماشي ... ياحسرة .
اما حكاية تمنعين الحليب ,فجربي وشوفي,أما كتّفوك وخذوه بالقوة,هذا إذا ماركبوا في ضرعك سيفون, يخترطونه دفعة واحدة. بضغطة زر بالكهربة .

دخل الخروف في هذه الاثناء , وانسدح على ظهره واضعا يديه خلف رأسه ورجل على رجل ,وزفر زفرة غير طبيعية,

الثور --خير يا طير, وشفي عيونك حمر ,شكلك ما رقدت من كم يوم,

الخروف:هذا يا غبي من الشجاعة ,ما قد سمعتهم يقولوا فلان أحمر عين.

الثور-- الله واكبر يا لشجاعة الي قطعت نفسها , عز الله عائلة عريقة,الخروف والنعجة والشاة ,وفرّان الرمادة والتيس والجفران,كلهم ينتسبون الى عائلة(آل غنم) تاريخ عريق في الشجاعة والاقدام,شاركوا في حروب البسوس , مسكين التاريخ ,كم حدّه يتحمل من الكذب والتزوير.

الخروف -- احترم نفسك احنا ما نتحارب مع البساس , ترى بقرتك أطلق منك, وعلى كبرك ترى ما معك قلب,ما معك الا هبشة رياري كما الدينمو) جوف صدرك تنفخ ليل الله على نهاره .والشغلة ماهي بالاجسام ,ما قد سمعتهم يقولون (لا تلمح لهم جنوب ,المح لهم قلوب) وبعدين يا لربع انا ما جيت ادوّر للمحاقر ,أنا جيت في خاطري بلقى لي خلق اتهرج معهم وافكك عن صدري,

الحمار –ههههههه يقول ما يتحارب مع البساس .. هذي حرب البسوس حرب قامت في الجاهلية يا جاهل وش عرفك بالتاريخ ... الله يعينك لاجت الصيفية ,كلكم محكوم عليكم بالاعدام,الا من شمله العفو.اما عيونك الحمر اللي كنّها الاصطب الكّذاب, انا ادري انها ما هي من الشجاعة ,اللهم الا ذبحك السهر من القلق ,والخوف من السكين. عشان العيد قرب وسمعت السفان يغنون : بكره العيد نحمي سمننا والتبيعه ترقص في الرباع ,, وخفت يضحون بك نسيت ان فيك عيوب ما تخولك للدخول في معترك الضحايا وجيت من القهر تبي تتنفس عندنا ...

الخروف—والله انك صادق وانا كل ليلة نتفقد بعضنا بعض ,ونتوادع ولا ندري من هو اللي بيندر البرحة,خاصة لاجاء يوم الخميس,نقعد نتراقف طول الليل.غريب أمر هؤلاء البشر ,يعاملونا بكل لطف ويوفرون لنا الاكل والشرب والمأوى,ويسخرون لنا اولادهم لخدمتنا ورعايتنا وحمايتنا, وفجأة والا هم متحزمين بجنابيهم ومتسلحين بسكاكينهم ,وبدأو يتنقون منا ولا يمسك الواحد الا بظهورنا ,ولا عمر واحد طالع في وجيهنا. والمصيبة أنهم ما يتنقون منا الا الاجواد.ولا تنتهي الصيفية ,وبقي منا واحد فيه فائدة,ما يبقى الى العجائز ,او البهم, ولا يراعون مشاعرنا ,يتخطفونا ولايهمهم مشاعر نعاجنا ولا بهمنا ,واحيانا يتخطفون البهم من بين ايدي امهاته, والمشكلة ,انهم يحتفلون على حسابنا.

الحمار--كل شيء مقدر والاعمار بيد الله, كلنا سنموت,صحيح انكم من المستضعفين في الارض يا(آل غنم) وهذا ثمن الاستسلام,وعدم المقاومة,حتى الثيران تتلقى ابادة مثلكم ولايغرك ضخامتها حتى اسمه ضيعه وصار عائلتة اسمها(آل البقر) ينتسبون الى أنثى,يعني انا افضل منكم أبا عن جد.

الثور--كذبت يالحمار, ا نا اقوى منك واذكى واعزّ نفرا ابا عن جد.ولا يقلل من قدري ان يكون اسمنا عائلة(البقر .. لا تغرك البدل المعلقة في اوتاد السفل : حلس , مترب , حفص , رقابية , ووو كلها اوسمة لاهانتك واستغلال قوتك واخرتها اذا ما شافوا فيك فايدة يرمونك راس المعرق تاكلك الوحوش ويجازونك جزاء سنمار ...

في هذه اللحظة جاء البس ولكنه ترك بينه وبينهم مسافة تحسبا للخطر وقال :صجيتونا ,جدي احسن من جدك وابي أحسن من ابيك,وجدي سوّى ,وانتم رابضين فوق الطيغة لو ما تجي كهلتهم تحطلكم جفوف كان عفنتم واخرجتمونا من هذا السفل الفندقي , قلوا لي وش سويتم انتم بدلا من التغني بالماضي.صجيتونا ما خليتونا ننام

الثور--الله واكبر,يا هذا النسب العريق,جد البساس, وش سويت انت وش سوّى جدك, تدري: توكل على الله رح شوف لك على منهم في مستواك,رح سولف مع البريهة) ,تقدر تخرّط عليها اما عندنا مالك سوق, ولا اعد اشوفك هنا,خذها براسك ,لا واعطيك لين يطيب الله في خاطرك.

لوا البس ذنبه ودخل آخر السفل ,وهو يقول في نفسه ,لو يتوكل هذا الثور على الحيوانات بيسوي بهم العجب العجاب.

الخروف ---طيب الى متى نستمر نتناقر ونحمّر عيوننا في بعضنا بعض ,ونترك هؤلاء البشر يعبثون فينا!!؟.تخيلوا احيانا يضعوننا صف واحد ويقصون وياخذون الصوف من فوق ظهورنا وانحن نتفرج في بعضنا بعض ,ولا نقدر نحرك ساكن والا نبرم بكلمة!؟؟ ولو دافعت عن نفسي ضد الظلم والعدوان,اعتبروني متوحش ومجرم استحق أشد العقاب.

الثور--وانحن احيانا ياخذونا للتسلية,ويعملون لنا حلبة مصارعة ,ويغرسون السهوم في اجسامنا والجماهير تصفق,فاذا صرعونا اعتبروهم شجعان يستحقون الجوائز والتبريكات,أما اذا دافعت عن نفسي وكسرت أضلاع واحد منهم ة,اعتبروني متوحش وهمجي,ولكن ما معنا الا الدعاء والتضرع الى الله ,ونصبر حتى يأتينا الفرج.

الحمار--كلامك طيب ,ولكن ماذا نعمل بعد الدعاء!؟

الثور— ما معنا الا نجي نتسدح في هذا السفل.

الخروف---والأخذ بالاسباب يعني مايهم.

الثور-- والله مالنا قدرة,هم يستخدمون عقولهم,يفكرون ويعملون,وانحن نعمل بدون تفكير ولا تطوير.

الحمار -- اذا نستاهل هذا أختيارنا,والامل في خلق جديد,جيل يختلف عنا , وانا أقول لكم تصبحون على خير,ودي انسدح, ما ادري وش يحصل بكرة النهار,لو يجي واحد من الجماعة معه شغلة, بدون تردد الشايب يرسلني معه دون مراعاة لظروفي,والا تحسبون إنه سيقول الحمار تعب والا ما رقد,خلوه يرتاح!!؟

الثور ---والله أنك صادق,حتى أنا لو يجي واحد يحتاج دياس ,لن يقول الشايب والله هذا الثور تعب,وودي به يرتاح.

الخروف---صحيح ,أني ما عندي عمل,لكن من الممكن اثنين تزاعلوا امسى ويأخذوني صلح ,وبكل بساطة ,والا وش دخلني بينهم..

الحمار --طيب واحد يطفي اللنبة,انا والله ما ادري منين آجي لها.

الخروف---والله ما عندي أي فكرة عنها.

الثور-- عرفتم قدركم الآن ,وتقولون سنتطور ونتحدى وتمدحون نفوسكم. حتى انا والله لو يدربوني سنة ما عزمت اعرف لها.

انتهت الجلسة ولا زال في القلوب علوم

.

 

 

يا رعا الله زماناً أرجعك

وكنت ستحرمنا من استكمال هذه الرائعة

ذكرتني بكليلة ودمنة وشخوصها من الحيوانات

لم اكتب الرد حتى نقلتها لمستنداتي فمثلها يجب حفظه


اسعدك الله يا ابا اديب وشهر مبارك

بارك الله فيك

دمت بخير

 

 

شكرا أبا / أديب
شكل نهاية الحوار
(( محوقة براطم))

 

 

رائع يا ابا اديب رائع سلمت يمينك واضم صوتي إلى صوت المهاتما عندما قال : انك (كنت ستحرمنا من استكمال هذه الرائعة ) لقد استمتعت بها كثيرا وان كان باقي شي منها هاته تكفى .

 

 

(انتهت الجلسة ولا زال في القلوب علوم )

هنا الصوتيم لهذه الحبكة الشعبية
أبو أديب تبقى رائعاً أو على رأي
جوزيف صقر رحمه الله :
( وعلى كلن .. وعلى كل حال
يعني في كل الأحوال) تبقى مذهلاً .

 

 

اخواني

المهاتما
صالح بن عطية
جبل الشعبة
ابو ناهل

يبقى الموضوع رائع لمجرد مروركم العطر
وتبقون اعمدة الساحة المتميزون وجودكم فخر لنا

دمتم ودام تواجدكم وحفظكم الله من كل مكروه