أبغى أعمر؟

قدر الله عليه وبغيت أعمر برّحت الارض وتوكلت على الله لكن عيال الحلال ماخلوني بحالي يادوب بأبدا بعد تبريح الارض الا وجاني مندوب البلديه حيا الله سلم الله قال لي معك رخصه قلت عندي رخصه على بالي رخصة السواقه اعطيته قضّب حواجبه قال تتريق عليه قلت لا هذي رخصتي قال عندك رخصة بناء قلت بناء وفي الديره قال ليه وين عايش قلت طيب هذي من وين ياخذونها قال ماالبلديه قلت طيب بكره وانا عندكم قال ممنوع تشتغل فيك بلاغ انك تشتغل بارض بيضاء قلت ياخي كل اراضينا سود خلاص بكره اجيكم واسويها رحت البلديه قلت ابغى رخصه قالو عندك صك قلت ماعندي لكن الارض حقتنا كل الجماعه يعرفونها قال انحن مانعرفها الا بصك قلت طيب وش اسوي قالوا رح طلع صك من المحكمه قلت طيب رحت المحكمه قلت ابغى صك على ارضي قالوا سكنيه قلت كيف يعني قالوا داخل نطاق العمران قلت مافهمت الاوله حتى افهم الثانيه كل المملكه داخل نطاق العمران ماتمشي شبر الا تحصل بيوت قالوا مصوره قلت ماعندي كمره بس اصورها لكم قالوا تتريق قلت اجل كيف قالوا عليها صور قلت لا قالوا رح صورها اول بعدين اعلن واذا ماحد عارضك نعطيك صك قلت طيب رحت اشتريت بلك عشان اصور وبديت اشتغل نط عليه مندوب البلديه قال ماقلت لك لاتشتغل قلت ياخي هم قالوه قال منهم قلت المحكمه قالوا صورها قال ماتصورها الا برخصه قلت طيب والرخصه كيف اخذها قال بعد الصك قلت كيف اطلع صك بدون مااصورها ماوافقوا قال مالي شغل طلع صك وخذرخصه واشتغل قلت طيب خلوني اصورها قال اول الرخصه قلت ماعندي صك قال هذا النظام قلت طيب والبلك وين اوديه قال تصدقه للي يصورون المقابر تصدقت البلك وبطلت اعمر حد منكم يشتري مني الارض بدون صك عشان اشتري لي بيت بصك والا انا غلطان لاياسيد غلط

منقول من مقالات الكاتب الساخر (السيد غلط) موقع ومنتديات العقشان