قصائد الشاعره عيده العروي الجهني (وحيدة السعودية)

.

*****

( يابو ظبي )

يابو ظبي جيت لاوجْلَه ولاَ خجلـه = أمـد كفّـي لـدانٍ دنْ وأدنيـتـه
دندن ودندن ودندن لي وانا انسجله = من بردة الحرف لحني لين دفّيتـه
يادار زايد ودِيم الحرف ترهج لـه = وأركانه الغـرْ تعشـب لاتهجّيتـه
فيك الذي كلْ كبدٍ رطب يلهج لـه = الله يعزّه ويرحـم حيّـه وميتـه
جينا على دعوته وركابنا عجلـه = لبّاه قَبلي سَنَـى العليـا ولبّيتـه
والبدو عدّ المراجِل يوم تَنْهَجْ لـه = ماترجع إلاّ وكبد الطّيب مِرويتـه

*****

 

 

.

*****

( الكحيله )

عديت لي رجم على راس نايـف = باقي رسومـه للبلـى مستهيلـه
مبناه شرق اللي على الخيف لايف = وايمن مسير اللي يجـي للنفيلـه
وقفت به وانـا وقوفـي كلايـف = وارخيت له عن عبرة العين شيلة
له جابني من ماضي الحب طايف = يوم الهوى صادف نفوس بخيلـة
ماني على المقفي كثيرة حسايـف = ولا نيب للبرق المجنـب مخيلـه
مـادام ماوبلـه بقاعـي ذرايـف = وش لي بحروة بارقه كـل ليلـه
انا وفيت وشفت ماكنـت شايـف = والحب عفته يوم هـذي حصيلـه
لا ابديتها من هرجة الناس خايف = واليا سكت بوسط كبـدي مليلـه
لي صاحب لا قبل ولا هوب عايف = متحيـر بيـن الطمـان وطويلـه
على ذلولـه موميـات السفايـف = تبدي لقلبي مابـدا مـن رحيلـه
ضحكت له وابديت زاه الشفايـف = وارويت من نبع الموده صميلـه
ان رحت ياكثر الركـاب النكايـف = ماكـل خيـال يحـوش الكحيلـه

*****

 

 

.

*****

( الطنب المشلوع )

لاَ سَلَّـمْ الله يميـنٍ مِـنْـك صادَتْـنـي = يا مدمـي الهامـه الله عَنْـك مرفوعـه
أعيـاك راسـي وطـاوَلْ للسمـا مَتْنـي = وانت اسكنَتْـك الدنايـا جحْـر يربوعـه
ماني بمثلك سحابـي مـا يجـي هَتْنـي = أنـا تـرى وابـلٍ جَـرّتْـه مَتْبـوعـه
وان كـان الانـذال عابَتْنـي وْسَبَّتْـنـي = الوَرْد يغري دبيب القـاع فـي ضَوْعـه
أنعمنـي الله عليـك ورام بـك فَتْـنـي = والتِبْـر بالنـار يُجلـى للبشَـر نوعـه
دِنْيَـاً علـى غيـر مشهاتـي تولّتـنـي = وانا على السِّلْـم الاوَّلْ واتْبَـعْ سْنوعـه
كم نوّخَتْ بـي علـى اللوعـه وْخَلّتْنـي = أظمـا وعـن جَمّهـا رِجْلَـيّ مَمْنوعـه
فيهـا كمـا الـوَرْق للأغصـان حَدَّتْنـي = يبكي وهو يطـرِبْ المشتـاق بِسْجوعـه
وانا على الشوك مـن مبـداي مَشَّتْنـي = ولا هي بتصفى وعمري يَطْوي شْروعـه
للقاف مـن غِمْدهـا الموجـوع سَلّتنـي = لين انثنيـت لْحَشـاي آدوزِنْ وْجوعـه
كـم وَقّفتنـي علـى الأطـلال وابْكَتْنـي = على رجا فَجْرها اللـي مبطـي طْلوعـه
آشِـبّ نـاري علـى النايـف وْشَبّتنـي = بالله وش حَيّ تصلي جوفـه ضْلوعـه؟!
خَلَّيـت مـا لـي حبيـب خْطـاه لَبَّتْنـي = والريح تدوي وطنْـب البيـت مَشْلوعـه
وشلـون كَـفٍ روَتْ جالـي وْلَمَّتْـنـي = رَدَّتْ على الروض الاخضر تَحْرِقْ زْروعه
والنـاس هـذا شفـوق وذاك يبهتـنـي = والسـوّ لـه كلمـةٍ بالنـاس مسموعـه
أقفـت ركـاب المـودّه مـا تحَرّتـنـي = لين أشْهَبْ اللال جَـز الرَّكْـب وِمْتوعـه
ما بين يَمْنَـيً سطَـتْ وِشْمـال لَفّتنـي = حب انطوى بالعـذاب وْبَـادَتْ شْموعـه

*****

 

 

.

*****

( علينا الدهر باللوعات )

علينا الدهر باللوعات أخنـا = وحنا تونـا مـا قـد قوينـا
نشوف الناس بالأيـام أهنـا = ومن أيامنا القشـر اشتكينـا
الين النجم فوق الـدو أسنـا = رفـع قـدره آلـه العالمينـا
وصار اللي بنا بالقول أشنـا = يبي منا الرضا لو ما رضينا
أخـي والله إن الله أغـنـا = عزيز النفس عن قولة عطينا
فلا بالمال ذا أرفع وذا ادنـا = وحنا من عيالك يـا حسينـا
ولكّن الدهـر للنـاس أفنـى = وأبقى ذكر نـاسٍ غانمينـا
ولا فاد الردي ولو قيل أغنى = إذا بالمال لـه فعـلٍ طمينـا

*****

 

 

.

*****

( من قصائدها في شاعر المليون الموسم الثالث ( بحة مواويل )

ياسيـدي الشعـر جيتـك مدنـفٍ بـاكـي = أسحب جروحي علـى بحـة مواويلـك
يومن رجع شدو عصفـورك لشباكـي = حلفـت لامسـح وجـع قلبـي بمنديـلـك
لي عام ما عانقت بك روحي افلاكـي = ولا ترحـلـت فــي رجــوى مخايـيـلـك
بـ..ارد عدودك واقيّل في ذرى الراكي = وارتاح عقب النهار الضنك في ليلـك
وارمي عباتي واوسد راسـي إنهاكـي = وانـام فـي حضـن تهليـلـك وترتيـلـك
تعبت من شكوةٍ مـا تنصـف الشاكـي = تعبـت أهلهلـك وامشـي فـي هلاهيلـك
تعبـت اغنيـك وردٍ واجـنـي أشـواكـي = وانزفك لوعه علـى رقصـة خلاخيلـك
واطرب بك اللي مريح القلب متباكـي = مايوم جرحه وطيت أقصاه في خيلـك
ياسـيـدي والليـالـي تتـعـب الـحـاكـي = يبطـي سنـا فجرهـا لا يسحبـه ذيـلـك
سـودٍ تجـر السـواد وصبحهـا خـاكـي = مـن بردهـا صاحـت القيعـان ياويـلـك
أشعلتهـا فيـك شـعـر ونــادت إيّـاكـي = مـن جـذوةٍ لا طفـت بـك بـايـدٍ حيـلـك
دوبك على المرهف اللي قـام يبراكـي = لا ارتد لك شعر يغرق هالدجى سيلـك
ياسيـدي يــوم جيـتـك مـدنـفٍ بـاكـي = أسحب جروحي علـى بحـة مواويلـك
لا تتـرك الشـدو عصفـورك بشبـاكـي = إمسح على الجرح في قافك ومنديلـك

*****

 

 

.

*****

( من قصائدها في شاعر المليون الموسم الثالث ( إيماءة شاعرة )

رقـيـت بْمـرقـبٍ تشـفـي هبـوبـه = أبي الراحه وقلبي مـا استراحـي
أرِدّ بْــه النـظـر مـنّـه وصـوبــه = واضيق وهالفضا حولي براحـي
شربت القاف لو هم حَثْربـوا بـه = أديـر أصفـاه مـن راحـي لراحـي
إذا غـيـري غــدا قـافـه ركـوبــه = يورّدهـا عـلـى الـجـال المـلاحـي
أنـا قافـي مــن المـزنـه سكـوبـه = قـراح وكــل مــا جـابـه قـراحـي
واذا ما الراس بالحيل مْعَصوبـه = تعلّتـهـا القـنـا مــن كــل نـاحـي
أنـا اللـي كـل ربعـه هَذْربـوا بـه = يجيه الهَرْج مـن واحـي لواحـي
إذا يــا رب هــذي لــي عـقـوبـه = أنــا تـايـب وراجـيــك الـفـلاحـي
تـرى قلبـي كمـا بيـتٍ عـدوا بـه = جيوش وْتَوّ نـور الصبـح لاحـي
واهيله يـوم عدوانـه غشـوا بـه = تغشّاهـم مـن المـوت الوشاحـي
فــلا عـمــده تـجـوّدهـا طـنـوبـه = إذا لـجَّــت جـوانـبْــه الـريـاحــي
وانـا قلبـي كمـا الـورْق اللعوبـه = لهـا بالجـو ممسـا واصطبـاحـي
على الغصن الشمالي مَعْ جنوبه = تـفـيّــا كــــل ظــــلٍ بالـبـيـاحـي
لـهــا نـــوحٍ تـعَـذْرِبْـه الـعـذوبـه = إذا مـا سِمْعـه المحـزون نـاحـي
دهـاهـا الـحـر والـيـوم بْغـروبـه = وّغَـرَّ بْهَـا الجنـاح أم الجنـاحـي
سمـت بالجـو مـا منْـه مْهَروبـه = وتلقّـتْـهـا وسـيـعـات البـطـاحـي
يــا أمّ الـطـوق والآه مْغَـصـوبـه = أبيحـي يــوم تثْخِـنْـك الجـراحـي
سبيـل المـوت للنفـس العجوبـه = أخيـر مْـن المهانـه والصيـاحـي
إذا مــا قـلـت يــا فَـــزَّاع نـوبــه = ولا مـن جَـرّدوا دونـك سـلاحـي
لـك القبـر إن تهايـل بـك جنوبـه = ولا وَقْفَتْـك فـي بـاب الشحاحـي

*****

 

 

.

*****

( قصايد حزن )

كنّ ماعشنا تفاصيـل الغـرام = ولا إتّفقنا عمرنا يقضي هنـي
ويش خلاّنـا بهالدنيـا حطـام = ويش خلاّ الشّوك للورده جنـي
هاجمت قلبي جحافيـل الظـلام = لين قلت إنّي عن الدّنيا غنـي
طير ياسي فوق قصر الحب حام = والدّجى عن نور جالـك لفّنـي
لو رحلت وشمت يلحقني مـلام = وإن بقيت أبرد ولا من ضمّني
ودّي أقصد فيك وأبكي والسّلام = ياقصايد حزن نوحـي دندنـي
واقعٍ عشتـه ولاهـو بالمنـام = للزّمـان المـر قبلـك ردّنـي
مر عام ومقتفي هالعـام عـام = وأنت ياقلـب الشّقـا ماتنثنـي
كل يومٍ فيك تعذيـب وخصـام = وماقدرت لكـل ريـحٍ تنحنـي

*****