حكايتي مع اللحمه؟

اشتهيت المرقه انا وكهلتي رحت للجزار قلت باخذ كيلو لحمه وتسوي لنا الكهله خبزه ونشرب مرق ونعين من الله خير وصلت الجزار قلت بالله كيلو لحمه من ذا الحسيل الصغير اللي يهني قال ابشر بسعدك قلت كم ياولد الكيلو قال ب(40) ريال قلت يامسلم قل خيرقال اجل بكم قلت اعرف تسعيرة البلديه الكيلو ب(28) ريال قال طيب رح اشتر من البلديه قلت افا والله لاشكيك للبلديه قال رح اشك حل عنا خلنا نشوف رزقنا شليت نفسي وانا كلي عزم كيف باشكي الرجال بطلنا من المرقه رحت البلديه او الامانه كما حولوا اسمها بسم الله عالامانه وانا داخل من باب الامانه حلوه الامانه لقيت صديق لي حيالله سلم الله كيفك اخبارك تقهو قلت مابي شي انا جاي ابي اشتكي واحد قال خير قلت ابي اشكي الجزار يقول اللحمه ب40ريال ضحك قال ياخوي ارجع وراك قلت افا حسبتك بتعاوني قال اقول توكل على الله وارجع لايسوون فيك بلاغ ازعاج السلطات قلت كيف وين السلطات هذي مي الامانه قال الا انت ماتدري ان كل محلات الجزاره اللي بالسوق حقت زوجات او اقرباء موظفين بالامانه قلت وانتم عارفين قال ايه قلت طيب باروح للأمين واشكيهم قال والامين عارف قلت الامين عارف قال يعني الامين مايأكل لحمه قلت والحل قال الحل مابه مرقه قلت طيب سلفني 12ريال عشان اكمل الاربعين واخذ كيلو لحمه نفسي بالمرقه قال ماعندي صرف رجعت البيت لقيت الكهله وين اللحمه يامخلوق واني قد سويت خبزه قلت مادريتي قالت لا قلت لحمة الجزار فيها جنون البقر ماقد سمعتي بجنون البقر قالت اللي يتهرجون عنه بالتلفزيون قلت ايوه قالت وش ادراك عن لحمة الجزار قلت لقيت البقره معلقه بكراعينا قالت طيب وش نتغدى قلت نطي فكي حق تونه وهاتي الخبزه وماشربت مرقه انا غلطان لا ياسيد غلط!

منقول من مقالات الكاتب الساخر( السيدغلط) موقع ومنتديات العقشان