ساحات وادي العلي - عرض مشاركة واحدة

**التوقيت** · 06-06-2013, 05:50 AM

ليل الهواجيس ... كلمات حمود العتيبي

راقت لي وعساها تروق لكم

يا ليل يلي عليه صرت دايم ثقيل
بالله قلي متى ياليل تربى الجراح

قصير عند البشر وانا عليه طويل
لانامت الناس انا سهران حتى الصباح

هويت فيك النجوم الجدي ويا سهيل
والشعر باللي يكن الصدر ياليل باح

هواجسن كنها البراق عراض المخيل
ياضامي اشرب حقوق السيل عدٍ قراح

تقهو من صافي الهاجوس بنن وهيل
شبت بصدري معاميله وبالشعر فاح

ابدع بيوت الشعر واختار منها الجزيل
في الهزل يا هل العقول الشم مالي صلاح

العبد لو طال عمره مقتفيه الرحيل
يعيش ما عاش في الدنيا هموم وكفاح

والناجح اللي على الاسلام ماله بديل
ثابت على الشرع ماهزته كثر الرياح

راعي عزوم قويه للثقيلة يشيل
طلق الحجاجين في وجهه تشوف السماح

حاتم زمانه لضيفه لو معاشه قليل
سموه من كثرة ضيوفه بمخلي المراح

وان جيت له في لزوم الناس راعي جميل
يقضي اللزوم صقر من صقور الفلاح

ما يكسب المدح رجال بجاهه بخيل
والا ليا جات للمدة يدينه شحاح

هذا كلام العقل ماهو بقال وقيل
من كان هذي فعوله يستحق المداح

واهل الحسد والنذاله ماوراهم حصيل
حاذور سدك لهم طول الزمن لا يباح

النذل لا تصحبه رفيق والا زميل
يضحك بوجهك وفي غيابك عطيب الرماح

اعطيتك اوصاف بعض الناس والله وكيل
ما قلت غير الصحيح اللي حسبته صراح

اليا ضميت اشرب الجمة وكب النثيل
هذي نصيحة مجرب خلها لك وشاح

يالله يالواحد المعبود مالك مثيل
تغفر ذنوبي نهار فيه خسر ورباح

وتجعل لنا في نهار الحشر ضل ضليل
وفي جنتك بعد قبض ارواحنا المستراح

...