.
*****
|| تعبت أسافر ||
تعبت أسافر في عروقي ومليت = من جلدي إللي لو عصيته غصبني
ياما تجاوزت الجسد وإستقليت = عن الألم .. لاشك جرحي غلبني
أنا سجين الحال .. مهما تسليت = وانا الطليق .. وكل شيٍ قضبني !!
حريتي لا عل .. يا كود ياليت .. = ما شفت حيٍ جاد لي ما سلبني !!
وليّت يا ليل التباريح وليّت = اما محاني الحزن وإلا كتبني
كل السما في دفتري وإن تجليّت = مثل الشموس .. غبار قبري حجبني
لي صاحبٍ وإن ما تخلّى تخليت = لا بد ما نهدم .. ولا بد نبني !!
|| بـدر بن عبـد المحسـن ||
*****