عروس الموت الأسود
تضحكين وْ يصير الحبْ لحاف وْ مخـده
تزعلين وْ ينام البـرد تحـت الجـذوع
تولهين وْ سماك تْهـلّ عشـق وْ مـوده
تسهرين وْ يغنّي ليل / ترقـص فـروع
تطلبين وْ بحرك يفيـض جـزره ومـدّه
كل لولـه ومرجانـه لصـدرك يجـوع
كل عاشق فـحضنك كم بكى و باح سده
ذكرياتك أماني , وصل , فرقا , و لـوع
كم تغنّت نـوارس شاطئـك و استـرده
للحنين اغنياتك ليـن فضفـض دمـوع
آه يا اطهر ورود الكون يا عطـر خـده
يا دفـا ليلـة مْفـارق جفـاه الهجـوع
يا عروس أُرملت والعيـد وجهـه يلـده
صار صدرك مقابر صار وجهك يـروع
مكيجوك بزبـد مـوت و زراقـه يحـدّه
و اختلط مع جمالك كـل معنـى جـزوع
زفّك المـوت وطْبـول اوليائـك تمـده
صفقوا بالأيادي , للجثث , في خضـوع
عطّشوك و سقوك الـدم وارووك شِـده
وأطعمـوك الأوادم وأرغمـوك القنـوع
أغرقوك فْ شبر مويه ! , ومن مدّ يده ؟
ما تشبّـث بيـدّك غيـر مـرّ الوقـوع
كّفنوك بْـعذر مكسوف وجهـه وصـدّه
حتّى صوته كتمه الحزن وارخى خشـوع
آه يا فقر يسكـن فـي غنـاك وْ يـوده
ما تفـرق سكاكيـن القهـر كـل نـوع
تزعلين وْ ينـام الفـرْح والبـرْد هـدّه
تضحكين ويعريّـك المطـر لـالضلـوع
تولهين وسمـاك تْهـل ضيقـه وحـدّه
تسهرين وْ يونّ الليل , تبكـي الشمـوع
تطلبين وْ يجيـك المـوت محـدٍ يسـدّه
كـل همّـه وأحزانـه بصـدرك تلـوع
كل عام و عزاك بخير يـا حُسـن جـدة
وأحسن الله سعادة عيد عـاف الرجوع