امّا انا قابلت لي غمرٍ حزين و صابه الوسـاس=ما تشوف إلا يدينه ترتعش ويجرّ صوت انفاسه
قلت يا ابن العم وش عندك ؟ عسى ما جاك بايرا=قال مادام ان لك قلباً حنون ابدي لك الأسرار
أناعندي سرّ ودي تنشره لاهل القلوب المرضى=ياعسى اصحاب القلوب المظلمه واهل القسا يحنون
رحت انا للشيخ بو صالح وادوّر للنَّسَب والزَّين=قال يا بشراك يا ولدي وقرّب دفترك والمرسم
مهرها (ميتين) من غير الذهب ولباسها المشروط=ولامها عشرين والأخوان خمسه كل واحد عشرهـ
استحي من بوك واللا كان حطينا شروط الناس=والخوات اربع ( ولا باجور ) حط لكل وحده خمسه
والْف وِاللا الفين للعمّات والجدّات والخالات=وقصر الافراح احجزه (نا) بوك بالعربون من ها لحين
والكوافيرا ورقـّاصات والشّـعّار والطـّـبّاله=والذبايح جب لنا خمسين كوزي واربعة قِعدان
ولازم تسافر بها شهر العسل مدريد واللا روما=واحضر المملك ونكتب عقدها واكتب شروطها
قمت مثل التايه اللي ما يفرِّق مِنْ يمين ويسرى=خذت لي خمسة صوالينٍ جديده كلـّها تقسيط
واندفع مهر العرب وشروطهم واخذت بنت الغالي=كلـّها شهرين لاوِنـّي مريض ولا خفاك الحال
ما بقي ما يقضي اِدْيوني ولا زادي ولا الإيجار!=وغادرت بنت القبايل لاهلها وبقيت انا وحداني
اتجرّع مُرّ ، وِشْ هذا الكوارث!؟ وِشْ حلولها!؟=ياعباد الله خافوا ربّكم وِشْ ذا الشّروط الصّعبه!؟
أكثر الشبّان في عُزْله ، ومَنْ يحصي المطلـّقات؟!=والله انّه هذا الأمر حيّر فكر ذا عاقل وأذهب لبّه
يا الله انْ تهدي عبادك ولطريق الخير دلـّهم=يا الله انْ تهدي عبادك ولطريق الخير دلـّهم