في الاسبوع الماضي ذهبت مع والدي الى جدة جوا في زيارة مكوكية
واثناء انتظارنا في صالة المسافرين بالمطار
كان الحديث من اليمين واليسار عن شؤون الاخرين وخصوصياتهم
وكلما سمعت والدي يرفع صوته بالاستغفار عرفت ان هنالك خصوصية تتداول
واليكم بعض مما سمعت
فصل
ما شاء الله تخرج فلان
وكم راتبه
والله انه ما يستاهل ربع راتبه آآهو ولد فلانه وش بيصير
فصل
شفت ذيك العمارة ذا هباها فلان
هيا منين جاب ذيك القروش وابوه مات ما عنده غير ذيك التبيعه
آآآهي من حقوق الناس اللي كلها وانتكتها في جيبه
فصل
فلان ابشرك تزوج ملقي له اسبوعين
من خذ
خذ بنت فلان
هو ما لقي غيرها وش معه وتعب القلب امها فلانه وابوها فلان
هاااك تدري : آآآهي امه قد دعت عليه والله انه ما يربح مخاطان
فصل
منهو ذياك اللي قاعد هنيك --- كنه فلان
ما شاء الله عليك عرفته
وهو وشبه قاعد بعيد هنياك
ذولاك اهل القرووش ما يركبون الا الدرجة الاولى ولا يباشر عليهم غير حرمه
كان تبقى شويه من قروشه تياك و( مدّ بها ) لعمه اولا ولد اخوه ذاك
لكن ( كبرة هذا الزمن )
خله هو الخسران يعني انه بيصل قدامنا
المشاهد والشواهد كثيرة
يتهموننا بالحسد والبحث في الخصوصيات ونرفض ذلك الاتهام جملة وتفصيلا
ونحن نمارس كل ذلك وأسوا منه في كل اقوالنا وافعالنا
فهل سياتي علينا يوم ونتحرر من هذه العادة السيئة
قولوا يارب
مشاهد كثيرة قد اعود لاستكمالها
دمتم بخير