صباحكم مساؤكم خير
.....................................
من المقولات السودانية الشائعة مقولة (الزول دا راميهو جمل ) كناية عن الزول (البهترش) وبقول كلام ما موزون .... لكن انا مريت بتجربة وانا صغير يمكن اطلاق مقولة (الزول دا راميهو حمار) عليها ،الله يكرمكم...واصل الحكاية انو في جارا لينا عندو كارو،درجت على قيادتها اثناء توقفها امام بيت صاحبها لما بكون عامل (كونكشن) لمشوار فرض عليهو المرور من امام المنزل... المهم انا كنت بقتنص الفرص وامارس هوايتي في (سواقة) الكارو يعني اخد لي لفة لفتين وبعدين ارجعها لمكانها قبال صاحبها يتنبه ... في يوم كدا لقيت الحمار مفكوك من الكارو وبتناول في وجبة من البرسيم لزوم (لنش)وكدا...اها يازول تقوم قريحتي تجود بفكرة انو انا اجرب الليلة اركب الحمار بدون كارو يعني(عري)ساكت... قمت يازول شلت لي (مطرق) كدا وبراحة استدرجت الحمار لحتة مرتفعة شوية من الارض و(هوب) ركبت...بدأصاحبنا الحمار يتهادى في مشيه رويدا، وانا اتمايل بجسمي يمنى ويسرى في ايقاع اشبه بايقاع الارجوحة... بعد شوية (ما النفس طماعة)،قلت ياود زود السرعة شوية ،قمت اديتوا (ترس) بضربة مؤلمة من (المطرق)... شوفتوا الطيارة لمن تأخد ليها وقفة في بداية المدرج وتقوم كدا تنبرم عشان تعمل (تيك اوف)...دا نفس الحصل لحماري العزيز... انتفض فجأة وبسرعة البرق انطلق وانا على ظهره زي كيس النايلون الفي رأس عود وهوا شديد ضاربو... غايتو خطوة خطوتين كنت متماسك وبحاول اسيطر على دفة القيادة ولكن هيهات الموضوع خرج من السيطرة تماما...طبعا لحدي هنا واترك باقي الرواية ل (ادم) الغسال الشاهد الوحيد على (هبوطي الاضراري )...حيث حكى لي فيما بعد انو انا طوحت من ظهر الحمار وطرت في الهوا مسافة متر، وسقطت على بقايا كوم خرصانة مستخدم في صيانة بيت واحد من جيرانا ، وانو هو(ادم) قام مهرول بانزعاج في محاولة يائسة لاسعافي ... فوجدني منكفي على جنبي وانا اهذي بهذيان مكتوم... وقبل ان يمد يديه نحوي نهضت واقفا (على حيلي) مصافحا له قائلا:انت ما عرفتني انا ما ود ام هاني جاركم بي جاي(وطبعا وسط ذهول جارنا ادم)... المضحك صاحبنا الحمار بعد ما رماني وقف بجانبي ولم يهرب وكأنما هو يتلذذ بنتائج فعلته ...المحيرني لي هسي انو ايه الخلاني اقول انا ود (ام هاني) وام هاني دي زاتا منو... ما قلت ليكم دي (هترشة) زول راميهو حمار.
--------------------------------------------------------------------------------
منقول من احد المنتديات الأزوالية