لعـلّ بـرّاقٍ صــدوقٍ خيـالـه = محـنٍّ مـرِنٍّ مرجحـنٍّ وهطّـال
حين ارتكب كنّـه شوامـخ جبالـه = مترادفٍ ذيله يجي سيلـه ارسـال
لجبٍ الى ربرب ربابـه صبـا لـه = من الشرق نسّم ردّ الاول على التال
تشوف عياز المزن وقت احتمالـه = طبوقٍ بجنحان الخضاري له امثـال
تنظر خشوم المزن يوضي بجالـه = صفايح الفضّـه بصالـوخ صقّـال
لكن طفـاح الربـاب اجتـوى لـه = هجمـة مغاتيـر حداهـن خيّـال
كن الرعد به والبـروق اشتعالـه = تتيبع اطواب الفرنجي الـى صـال
ونضناض برقه في مثانـي خيالـه = لانشّروا شرع المراكـب بالادقـال
الى هلّ طار غبـار خـدَّه وشالـه = والتجّ وديان الوعر والسهل سـال
يسقي مفالـي ديـرةٍ ضـمّ جالـه = مايعجب الناظـر بشوفـه ويهتـال
برباه حور العيـن يسحـر جمالـه = وحماه هو مربى الجوازي والاطفال
دارٍ لنا وادي الرمَه هـو شمالـه = غربيّه الضاحي وشرقيّـه الجـال
في روضةٍ شرْف المبانـي قبالـه = لجّة غروسه دايـرة تقـل تفصـال
غيـن وبساتيـنٍ ظليـلٍ ظـلالـه = متمايلٍ كالـدّوح شاملْـه الاقبـال
فسايـلٍ كالتيـن يـاحـيّ فـالـه = وفواكهٍ فيها الثمر والحمـل مـال
كالليل ولا الحشـر لجّـة محالـه = ماها ومرعاهـا مـزّي وسلسـال
دارٍ لنجد مشـرعٍ كـم عنـى لـه = راجٍ ومحـتـاجٍ ولاجٍ ونـــزّا ل
والضيف هو ويّا الضعيف ارتكى له = كرام النفوس اهل القواعد والافعال
دارٍ يجير الجار بـه مـن جلالـه = ويشمل من الباري بها عزّ واقبـال
دار النّـدى دار السعـد والشكالـه = ماساقت الخاوة لـلاول ولا التـال
حموا حماهـا بالمراجـل رجالـه = لين اوحشوا من جا لجاله بالافعال
صالوا وصاطموا الدول دون جالـه = بحربٍ وضربٍ يسند العايل الى عال
بـرايٍ وتدبيـرٍ وعقـل وصمالـه = وصبرٍ وتقديـمٍ وتوخيـر الاحـوال
بعزمٍ وجـزمٍ كـان همّـوا بقالـه = ماثمّنـوا أو طاوعـوا شـور ذلاّل
فان برّكوا للـراي شالـت حمالـه = زمل التخوت اللي يشيلون الاثقـال
شالوا حمـولٍ مايـراوز مشَالـه = العفو مااصبرهم على كلّ الاحـوال
أخيار واشـرار الـى جـا مجالـه = وعقّال في حالٍ وفي حـال جهّـال
عـدامٍ شغاميـمٍ كـرامٍ سبـالـه = هم سورها وحماه كان الوحل حال
يعجبك مرباع الغميس ان غدا لـه = نور بنوّاره وبـا ازهـاره اشكـال
ماحدّر الـوادي وغـرب شمالـه = من وادي الروضه الى خشمه العال
ومقياظها حدّ الوعر مـن سهالـه = رامه ومهره والبريقا الـى الجـال
أمٍ لنـا مـن عقّهـا مـن عيالـه = عِدْم البصر والسمع والمال ورجال
وصلّوا على المختار ختم الرسالـه = بازكى صلاة تبلـغ الصحـب والآل