البارحه يوم الخلايق نياما = بيحت من كثر البكى كل مكنون
قمت اتوجد له وانثر علاما = من موق عيني دمعها كان مخزون
ولي ونه من سمعها مايناما = كني صويب بين الأضلاع مطعون
والاكما ونه كسير السلاما = خلوه ربعه للمعادين مدوين
ولافونت راعبيه حماما = غادي ذكرها والقوانيص يرمون
تسمع لها بين الجرايد حطاما = ومن نوحها تدعي المواليف يبكون
مرحوم ياللي مات شهر الصياما = صافي الجبين بليله العيد مدفون
حطوا عليه من الخرق ثوب خاما = وقامو عليه من الترايب يهلون
مرحوم ياللي مامشى بالملاما = جيران بيته راح مامنه يشكون
اخذت انا وياه عشره اعواما = مامثلهن في كيفه مالها لون
والله كنه ياعرب صرف عاما = وياحيله الله شغل الأيام وشلون
واكبر همومي من بزور يتاما = لاجيتهم قدام وجهي يبكون
وان قلت لاتبكون قالواعلاما = نبكي ويبكي مثلنا كل محزون
قلت السبب تبكون قالوا يتاما = قلت اليتيم انا وانتم تسجون
مع البزور وكل جرح يلاما = الا جروح بخاطري مايطيبون
قمت اتوجد عند ربع حشاما = وجوني على فرقا خليلي يعزون
قالوا تزوج وانس لامه بلاما = ترى العذارى عن بعضهم يسلون
قلت انا اخاف من غاديات الزماما = اللي على ضيم الدهر مايدارون
تزعل عيالي بالنهر والكلاما = وانا تجرعني من المر بصحون
والله لولا هالصغار اليتاما = واخاف عليهم من السكه يضيعون
لاقول كل البيض عقبه حراما = واصبر كما يصبر على الحبس مسجون
عليه مني كل يون سلاما = عده حجيج البيت واللي يطوفون
وعداد مانبت النفل والخزاما = على النبي اللي حضرتوا تصلون