حمامة الروض
حمامـة الـروض .. ولّـي ياشقـاويـه
مانيب ناقص مصابك .. يكفـي مصابـي
انـا .. ماكـوّدت اسـجّ شـوي ياخيّـه
زدتينـي بسجعتـك .. زودٍ علـى مابـي
الغابيـه غابيـه .. بالـصـدر مكمـيـه
وانـا مانيـب مهبـولٍ يفضـح الغابـي
اخـاف مـن روحتـن ماعقبهـا جـيّـه
يومٍ به اللوم .. يشهـق شرهـة عتابـي
خاسي وهابي .. مجازي الطيـب بالسيّـه
راعي الرديّـه رديّ .. وخاسـي وهابـي
في نحو (ابو الأسود الدؤلي) .. له نحيّـه
ذا النحو نحوي انا .. وإعرابـه اعرابـي
ترابي اولى بـي .. ان خابـت هقاويـه
وأن عوّدت للتراب .. ترابي اولـى بـي
هـذا ترابـي . . وأنـا زبـن الجلاويـه
وكنـوز قـارون ماتشريـك يـا ترابـي
سقوى .. سقاه الحيا وقـتٍ مضـى ليـه
يوم الرخا محزمي .. وزهابي .. زهابـي
يوم ارضي المسقـوي عالوسـم مذريـه
ودون اللحـى فـرخ بلجيـكٍ وشبّـابـي
يوم إنّي اغمـض مريـح البـال جفنيـه
قبل السهـر تستبيـح جيوشـه اهدابـي
من قبـل ماشـوف وقـتٍ دارت رحيّـه
وضيوف (بقعا) سرى .. وقفوا على بابي
وقتٍ ليـا ضحـك نابـي جـات بلاويّـه
كنـه حـرام علـي الضحـكـة بنـابـي
قد لـي خـلاوي 8 سنيـن .. وشويـه
هذا .. وانا لانـي بمجـرم ولا ارهابـي
احدن بكى ميته .. واحـدن بكـى حيّـه
واحدن على الصدق عاش ومـات كذابـي
احيـان .. أهيجـن وأغنـي للهواويــه
وأحيـان .. كـل الهواويـه تغنّـى بـي
واحيان .. احصّل لي مـن القايلـه فيّـه
وأحيان .. من حرقة القيض الله ادرى بي
رهنت لـي بنـدقٍ .. فـي ديـن جنبيـه
وش يآخذ المرتشي مـن ذمّـة.. مرابـي
ظامـي وورّدت بيـرٍ دونـهـا الحـيّـه
الله يجازي زمانـي ويـش سـوّى بـي
رزقـي علـى عالـمٍ جهـري وخافـيـهّ
ومـن مثـل ذا الجـود رزاق ٍ ووهابـي
وين انت يالحزن ؟!! يا اجمـل غناويـه!
أذّانـي الهـم بغيابـك وشـقّـى بــي
من بيـن غيّابـي ابطـت بـك حراويـه
فاقـدك .. ياأعـزّ غايـب بيـن غيابـي
وين انت ؟!! ياصاحـبٍ ماولفنـي زيّـه
ياقو قلبك! .. تخلي الهم يسلـى بـي؟!!
ودّه اشقـق ثيابـي غـصـب بإيـديـه
والله لأموت .. ويـدي ماشقّـت ثيابـي
ودنيا الهبـا .. سـوّّد الله وجههـا فيّـه
أبرد صودايفها .. ياما احـرق اعصابـي
يرضيك بالله؟!! تبيّـت بـي علـى نيّـه
قبل اتعشـى لياليهـا . . تغـدا بـي؟!!
هيّا تصدّق !! كـذا . . وبـدون ماريـه
استنزفت كلّ جـرح ٍ . . قـد تخبّـا بـي
خلتني أهجّ واعطـي الخبـت . . رجليـه
والعجّ راح بصميلي .. وأذهـب ركابـي
ثـم ادرجـت بـي مهاميـة الزرّاجـيـه
وجت بي وأخفّ الطعون .. شلاف وجنابي
يرضيك يالحـزن!! . . ياتالـي عزاويـه
تضحك على شيب راسي .. بين شيّابـي؟
يرضيك يالحزن؟!! تجهر بـي علانيـه؟
حتى تهاون بحالـي اقـرب اصحابـي؟؟
وجـدي وجـود اجـوديٍ صـار عاريـه
هذا وهو مـن ولـد .. عتّـاق الأرقابـي
وجـود محكـوم ماقبلـوا مـنـه ديّــه
وخلوه مابيـن سيـف ونطـع ونصابـي
كلـن تتقـى طعـون عــداه غـدريـه
وأنا الوحيد اللي طعونـي مـن احبابـي
وأن مـت .. قولـوا لفاقدنـي وداعيـه
والله مانـي ردي .. وقتـي تـردى بـي