خدود الرمل

خـدود الرمل بشـت بالحيا من حـبة الهمـلول
وانا تحـت المطـر ما بل غـير دموعـي ردوني

ومر العشب ف اقـدام السحاب المقفيات حجـول
رحـل فـصل الربيـع ومادرت بـه زهـرة جنوني

سألـتك لـين ماجـف النـصي وانشـق للغـرمول
شـفاة مـن هـجـير الصـيف والعـربـان ملوني

سألتك لين ماشاب الكحـل في حاجـر العطـبول
وطلـق هالحـنين إبله هـمـل في غـفلة عيوني

سألتك لحـظـة بيـضا حـبـيب وحـاجـب مفـلول
وصـدق يعـتق ابهام النـدم مـن عـضـة سنوني

وانا المنثور فوق البيد تجمعني تعب ونحـول
وتسـأل عـرقـي اليابس مـتى عافـتـني غصوني

تكلم طال صـبري فـي انتظار المـر والمعسـول
تكـلم لين يخـدعـني يقـينـي وتـصـدق ظنوني

حبيبي شالوا عـيوني هـلي والراحـلين حمـول
وقـفوا مابـقى لي غـير قـلـبي داخـل جفوني

الا يا الله كان اللي مضى لي يشبه المجهـول
تـــيسـر لـي عـدو ما عـليه اشـباه مضنوني

غدا يشبهني في الساعة عبث هالعقرب المشغول
أعـد اللي رحـل بي وان وقـفـت بيرحل بدوني



بدر بن عبدالمحسن