اريتريا .. تقرير مطول

السلام عليكم

في شعبان الماضي كنت اتمشى بالشيخ قوقل كالعادة

وطحت بالصدفة بموضوع عن ارتيريا
اذكر اني كتبت موضوع ايامها عن اقتصادها , بس تراني عجاز مافيني من دور الرابط وجابه , اللي يبيهه الله لايهينه يدوره ولايدور بالشيخ قوقل وبيلاقي احسن منه
بعدها لقيت نفسي انشد لها كدولة وابحث عن اي معلومات عنها , خاصة اني تقريباً ماخليت محل باقصى الشرق ولا الغرب <<< اخس يالرحالة بن بطوطة
وهذي حذفت عصا جنبي , قلت يابو يزيد مابدهاش انقز استكشف الديرة وتمش واللي عليك بالخير , اقلها تقارن بينها وبين اثيوبيا اللي زرتها من ثلاث سنوات تقريباً
لفلفت بالشيخ قوقل واخذت معلومات اكثر عنها
سئلت عن سفارتها واذا كان لابد من فيزة , وتسهلت لهم ببداية رمضان
راجعت السفارة وكانت بحي المعذر بعد تقاطع التخصصي مع خريص غرباً
اعطيتهم الجواز وباقي طلباتهم الساعة تقريباً 11 صباحاً , وقالوا تعال الساعة 2 وتلاقي الفيزة جاهزة , اذا ماني ناسي كانت الرسوم 225 ريال
بعدها توجهت لمكاتب السفر والسياحة , ولا لقيت اي خطوط تروح لها من الرياض غير اليمنية , على كلامهم كانت السعودية تسير رحلات سابقاً ثم توقفت , وايضاً كانت ناس وتوقفت ولا ادري ماهي الاسباب
بالعافية لقيت حجز وكان بتاريخ 23 رمضان درجة اولى بالذهاب وضيافة بالرجعة , السعر للتذكرة اعتقد كان 1800 ريال للسياحي , بس اصفقوني 2905 علشان الاولى من الرياض لصنعاء
الغريب ان الفرق بين صنعاء واسمرة عاصمة ارتيريا كدرجة اولى 5 ريال بس
لأني قلت للموضف يحجز لي الرياض صنعاء درجة اولى بما ان مافيه حجز الا عليها , وحجز الروحة كلها اولى , ويوم سئلته ليش قال الفرق 5 ريال فخذها اولى كلها ! قلت توكلنا على الله قصها
قبل السفر بايام اتضح لي ان احد الاخوان من الجنسية الارتيرية واعرفه من فتره طويلة موجود هناك , اتصلت عليه وخذيت باقي المعلومات عن كل شيء , وقلت له يحجز لنا فيلا بدلاً من الفنادق لأن فنادقهم كلها خمس نجوم بالسالب اللهم فندق الانتركونتننتال <<< اتحداك تعيد اسمه خمس مرات
هو الوحيد اللي خمس نجوم بالموجب , طبعاً تغير اسمه بعدين الى اسمره بالاس حسب مافهمت من سنتين لأنهم كانوا ياخذون على الاسم 50% من الارباح .
وهذي بعض المعلومات عن ارتيريا
تقع مقابلة لمضيق باب المندب الله لايضيق علينا , يحدها شرقاً البحر الاحمر وشمالاً وشمال غرب السودان وغرباً اثيوبيا وغرب جنوب ايضاً اثيوبيا ومن الجنوب جيبوتي .
مساكين حياتهم كلها استعمار , سيطرت على شواطئهم الشرقية الدولة الاموية ثم العثمانية بالكامل اللتي بدورها تنازلت عنها للخديوي باشا ثم استعمرها البرتغاليين ثم الايطاليين وبعدهم البريطانيين وآخرهم اثيوبيا <<< كل ٍ يتشاوى قسمه فيهم
حتى حصلوا على استقلالهم عام 1993م
رئيسهم اسياس افورقي , وشكله متأثر بالحكام العرب جيرانه , من استقلوا والكرسي معجبه وحالف مايتركه لأحد غيره ! طبعاً مقصوف العمر مسيحي
الدولة تعتبر من افقر الدول بالعالم , ويعمل 80% من السكان بالزراعة والرعي
يبلغ عدد السكان 4,750,000 اربعة مليون نسمة , اعتقد اغلبهم برى ارتيريا مهاجرين بسبب الفقر
تبلغ ميزانية الدولة كإيرادات 257,000,000 مليون دولار ! والمصروفات 424مليون ! اللاعب ميسي اغلى من ميزانيتهم !!
عملتهم النقفة ويعادل الريال 11 نقفة بالسوق السوداء , وبالبنك يعادل الريال 4 نقفة ! الا يا صارف من البنك
معدل الرواتب 500 نقفة يعني 45 ريال تقريباً !
يعني الشغالة تشتغل برمضان عندنا بـ راتب 2500 ريال كأنها اشتغلت بديرتها 4 سنوات متواصلة !!
الشعب جداً طيب وحبيب وكل واحد في حاله
حسب مافهمت ان ارتيريا تتكون من 12 قبيلة منهم قبيلة الرشايدة ويتواجدون بمدينة مصوع على البحر الاحمر كأكثرية هناك
بالمناسية هجرة الصحابة رضي الله عنهم للحبشة كانت عن طريق مدينة مصوع
الديانة الاسلام والمسيحية , واللغات كثيرة واغلب من يتكلم عربي بشرق الدولة تحديداً على سواحل البحر الاحمر ..
نجي الان للصور
بالبداية الصورة الاولى مالها دخل بالتقرير, لا من قريب ولامن بعيد
بس كنت ادور بدروج ورفوف وكراتين كمبيوتري علشان اطلع الصور لكم , ولقيت بالصدفة صورة حشاشة قلبي , البنت الامورة العسولة الشطورة
يوم شفتها قلت بيني وبين نفسي والله يابنيتي ما بصورهم وديرتهم اغلى منك
بحط صورتك اول صورة <<< يسمع بالمثل اللي يقول اخطب لبنتك ولا تخطب لولدك , يعني نقدر نسميها تسويق احترافي
بسم الله هذي صورة القمر
ترى مانت خسران شيء لو قلت ماشاء الله

توجهت للمطار حيث الرحلة في يوم 23 رمضان الساعة 4,45 عصراً الاقلاع

متجهة من الرياض الى صنعاء على الخطوط اليمنية

اول ماركبت الطيارة جيت مدرعم للمقعد A1
ولاقي ذاك الشايب اللي متكي بالكرسي وعلى رقبته ربطة وآثار طق ودبغ مبرح , بالعربي الرجال معفوس وشكله ماكل علقه قوية
وقفت هنيهة << متعوب عليها والله
احترت اقومه ولا لا ..
وشوي الا يوم تخاطفوني الجن والعفاريت مدري وش السالفة
قرب واحد وصار بيني وبينه بالنص قال تعال هنا, ويحطني بالكرسي اللي بعده
قرقعت بقلبي وتعوذت من ابليس , ياولد خلاص شايب وانت صايم مشيها بئه مادئش , وماباقي على المغرب الا شوي
جلست ومديت كراعيني عزكم الله وغفيت شوي
وتصحيني وحدة ملقوفة , قالت مفطر ! قلت لا وش فيه
قالت ابد بس علشان المرطبات
المهم لاحظت كل شوي يجي واحد ويسلم على الشايب العايب اللي خذا مكاني جعله مايتهنى فيه
واحد ثنين عشرة عشرين ! حتى الكابتن بشحمه ولحمه خلى الطيارة تلعب بالسماء وحظر يسلم على راسه ويديه !
يوم قربنا ننزل وربطنا الاحزمة قالوا افطروا
افطرنا قبل الهبوط بدقيقتين بالضبط
نزلت الطيارة واللي علينا بالخير , وشوي قالوا الطيارة بتوقف بس لاينزل احد !
بالفعل وقفت وفتحوا الباب
وعينك ماتشوف الا الكميرات والفلاشات والعسكر وناس طالعة وناس نازلة
اثاري الدربكة كلها طلعت علشان الشايب , طلع طويل العمر رئيس مجلس الوزراء اليمني علي مجور مدري مقور
كان مصاب مع علي صالح ويادوب طلع من المستشفى
الربع طولوا باستقبل وودع , واخذ الركاب الفضول وقاموا ينزلون شوي شوي حتى مابقى غيري بالطيارة
شوي ويطلعونهم كلهم للطيارة الا طويل العمر وحاشيته
وجلست الطيارة تمشي على المدرج يمكن ربع ساعة , يدريك انهم نزلوه بعيد عن الصالات
وبما ان الرحلة ترانزيت انطقيت الى الساعة 10 مساء حتى جاء موعد الرحلة الى اسمرة
ركبنا واقلعت الطائرة ووصلت الساعة 12 تقريباً منتصف الليل
اول ماوصلنا رحت للعفش وخذيت شنطتي ومريت السوق الحرة
يوم دخلت السوق الاهو اصغر من بقالة ابو محمد << بقالة بالحي صغيرة 4في 5متر
وفيه فراش وبطانية للموظفتين يتناوبون النوم فيها والله اعلم
شريت بعض الاغراض ويحطونها في كيس من قماش !! مثل كيس الدقيق
اتضح فيما بعد ان ارتيريا كلها مافيها اكياس بلاستك نهائياً ! وكل الاكياس لديهم عبارة عن قماش يفصل ويخيط مثل بيت المخدة ! باحجام مختلفة
وكل ماحبيت تتسوق تاخذ كيسك معك او تشتري كيس جديد !!
ونا على وشك الخروج من المطار الا وشوف الناس متجمعين حول طاولة
عرفت فيما بعد انهم يسجلون مامعك من الفلوس , وياويلك وسواد ليلك لو جيت طالع من عندهم ولا جبت مايثبت انك صرفت فلوسك من البنك !
عرفت لهم وحط فلوسي كلها بالشراب عزكم الله ولا خليت الا طفسه يسجلونها
انتهيت منهم وجيت طالع
ادور الخوي مالقيته مع اني قايل له موعد الوصول
طلعت تلفوني بتصل عليه , طلع موبايلي مايشتغل عندهم بتات البته !
طبعاً استانسوا حقين الاختلاسات << حتى انتم ماتشتغل تلفوناتكم هناك
مافيه الا شركة وحدة اللي تشتغل اكيد ماباقي الا هي عرفتوها << للأسف شركة الاتصالات الارتيرية بس !! يعني حتى حقين زين مايشتغل
ياوالله الورطة شلون الاقي العلة , لاهو موجود ولا التلفون يشتغل
رحت لحقين التكاسي ابي تلفون بشيمة ولا بقيمة
عربي مايتكلمون , انقليزي برضه مايتكلمون ويادوب يفهون علي وافهم عليهم
اعتذر واحد ان تلفونه مافيه شحن , والثاني قال الرقم خطأ , واثاري مضعوف المترس ينقل الرقم من جوالي بالمفتاح الدولي يوم كلمت خويي من اليمن
قفلت معي وعزمت اروح للفندق , وتوني باركب التكسي الا طويل العمر يوصل
وينك قال من اليوم انتظرك بالكفيتيريا ! ونا وش دراني انك بالكفيتريا يالخبل
المهم ركبنا ورحنا للبيت , ولقيته ماخذ ذيك الفليلة الحلوة

كانت الصورة بالاعلى من الخارج
وهذه الصورة من الحديقة بالحوش

كان سعرها تقريباً 800 ريال طول السفرة
هناك على فكرة ما يأجرون باليوم , لازم تاخذ شهر او تدفع حق الشهر كامل
حتى ولو ماراح تجلس الا يوم او يومين
لذلك بالمدة القصيرة يفضل طبعاً الفندق
ريحنا بالفله شوي وزبط الخوي والشغالة السحور
واسمع صوت المزعج هذا قريب من البيت

الصورة هذي خذيتها له يوم اصبحنا
شوف كيف عايش وسط العشب , لاشعير ولا قراطيس ! قال بلدي قال
قلت للخوي شوف , انا رجال ما احب الازعاج , واللي يزعجني اذبحه وآكله !
فهمها الخوي ويوم اصبحنا شراه من الجيران بـ 150 ريال تقريباً
ذبحناه وافطرنا وتعشينا وتسحرنا عليه , بالعافيه علينا
اليوم الثاني بديت استكشف المدينة
ومريت بندتهم وكارفورهم وعثيمهم وهذي صورتها

البقالة هذي حصلي معها موقف غريب
شريت مرة بيبسي من عندهم بعشرين نقفة
اليوم الثاني مريت وشريت برضه بيبسي وطلعت عشرين بعطيها البايع بالمحل
قال لا ثلاثين ! انا شكيت قلت يمكن امس كنت شاريها بثلاثين
اليوم الثالث جيته وشريت ببسي وطلعت الثلاثين قال لا خمسين !! عمى يعميك يالثور
وش السالفة مدري , بعدين عرفت من خويي الارتيري ان الببسي يأتيهم من السودان ! فإذا جاهم الموزع يبيعونك بعشرين سعره العادي , فإذا تأخر الموزع وقلت الكمية عندهم بدأو برفع السعر , وكل يوم يتأخر الموزع يرتفع السعر اكثر واكثر !!
حتى يأتي الموزع من جديد فتعود الاسعار لوضعها الطبيعي !!

الصورة بالاعلى لشارع مخصص للمشاه فقط !
فإذا معك سيكل الله لايهينك انزل منه ودفه لين تتعدى الشارع هذا
وهذي صورة لشارع العليا عندهم

اما محطات البنزين فأمرها غريب
اذا عبيت قام العامل يعصر لك اللي ! بمعنى يرفعه من فوق من عند المكينة حتى مايبقى باللي ولا قطرة !!
مثل كذا

الشيء الثاني
اذا تبي شيء من السوق لازم تشتري اغراضك بدري
لأنك يستحيل تلاقي محل فاتح بعد الساعة 8 مساءً !
خلاص 8 بعدها الله يعينك تنتظر لليوم الثاني
مايفتح بعد الوقت هذا الا محلات الدشرة والصياعة
يعني لابقالة ولامحطة ولاصيدلية ولاغيرها
على ذكر الصيدلية
توقع تلاقي بصيدلياتهم كل شيء بإستثناء الدواء والعلاج !!
واذا فيه ادوية فهي محدودة جداً جداً ! يمكن حتى البنادول ماتلاقيه
....................

باليوم التالي بدأت بإستكشاف العاصمة اسمرا , فركبت تكسي بصحبة الخوي وتوجهنا لمركز المدينة وشارع كمشتاتو تحديداً

كانت وسائل النقل المتوفرة لديهم على ثلاثة اشكال داخل العاصمة
الباصات والتكاسي , وتنقسم التكاسي لقسمين
الباص بسعر 5 قنفة من اول المدينة الى اخرها وتعادل القيمة نصف ريال او اقل !
التكاسي نوع بـ 10 قنفة وهو ما تركب معه ومعك بعض الركاب الاخرين , بمعنى يشيلك ويشيل غيرك معك , وقيمته اقل من الريال الواحد
والنوع الثاني من التكاسي اسميهم عيال العز !
لأنه واقف باماكن محددة مايتحرك حتى يجيه الزبون , وسعره 50 قنفة تقريباً تعادل 4,5 اربعة ريالات ونصف , وهذا يوصلك وين ماتبي داخل المدينة وبدون مايركب احد غيرك
هذي صورة لشارع كمشتاتو اشهر الشوارع لديهم ومركز المدينة

وهذي صورة للباصات لديهم
وتتضح الزحمة بداخله , يستحيل يمشي وباقي فيه مكان لشخص اوشخصة جلوساً او وقوفاً , ومع ذلك لايوجد لديهم سرقات اطلاقاً , لأنه ببساطة لو احد الركاب انسرق , الباص كله يروح باللي فيه لقسم الشرطة للتحقيق !
وبما ان الدعوى فيها قسم وتحقيق ومرمطة وممكن نوم بالسجن حتى يلقون السارق , قضوا على النشالين والحرامية , يعني من الاخر مش ممكن تسمع واحد يصيح مثل المصارية ويقول انا اتسرئت يارقالة ..

على جنبات الطريق توجد المحلات بمختلف اشكالها

واكثر المحلات لديهم محلات القهوة , يمكن الشارع هذا فيه اكثر من عشرة مقاهي , شعب يحب الجلسة والسوالف والقهوة , احس ماوراهم شيء فاضين
وبمنتصف الشارع توجد كنيسة الكاتدرائية والمبنية قديماً بزمن الاستعمار الايطالي , وخلفها داخل الحي بمسافة 300متر تقريباً يوجد مسجد الخلفاء الراشدين
هذي صورة للمسجد
وبتلاحظ بالمنتصف مدري مودماني ولاجني مسرع
مانتبهت له الا بعد ماوصلت البيت

وهذي صورة الكنيسة
الكاتدرائية على شارع كمشتاتو

مع التمشية بيوم من الايام لاحظت الحجة هذي تبيع لوز مشوي !!

ريحته تخليك توقف وتطلب منه غصب
شفتهم كذا مرة وكان نفسي اشتري منهم على الاقل كنوع من التجربة
وهذي صورتها

بعد ماصورتها وهي تشوي اللوز
حبيت اقولها اني صورتك مخافة اني تعديت على خصوصيتها
لأني اصور بالايفون وماتدري انه يصور
وبالفعل مجرد ماقلت لها اني صورتك وانتي ماتدرين ياحجة زعلت وبرطمت
وتقوم تسبسب زعلانه , قلت حصل خير تبيني امسحها مسحتها ولايصير خاطرك الا طيب , قالت ايه امسحها , طبعاً المترجم الخوي
ويادوب بمسحها وهي تلعلع قلت للخوي هي وش تقول ؟
قال تقول ورها الصورة و المفروض انك قلت لها قبل التصوير علشان تزبط حالها وترتب نفسها
قلت قلها تبشر يالله جهزي نفسك وبصورك ياحجة
توقعت انها بتروح لمحل كوافير ولا للعيادات التجميلية بتشد شيء ولا بتنفخ شيء
قامت ولفت البلية اللي على راسها وقالت صور !
وانتصبت كما كليوبترا
وهذي الصورة بعد ماتشيكت على الاخر
عموماً تراني مستأذنها اني بحط صورتها بالتقرير بالنت , وكانت مبسوطة

من الملاحظات عندهم الموية

الموية عندهم شيء ماهوب صاحي , عمري ماذقت ماء بحلاوته وطعمه
تشرب تشرب ماودك توقف
طبعاً لأنه امطار وعلى مدار العام عندهم بعض الانهار الجارية
من الفقعة وكثرة الماء عندهم تلاقي ببعض الشوارع ماصورة مفتوحة
للشرب والغسيل والوضوء , ايضاً لاحظت شبكة تصريف السيول شيء خيال
المطر 24 ساعة واذا وقف ماتلاقي قطرة بالشارع بعد خمس دقايق
اعتقد يبي لنا 50 سنة بالرياض حتى نصل الى شبكة مثل التصريف عندهم
اما اهل جدة فاعتقد يبيلهم 49 سنة ضوئية !
هذي صورة لواحدة من مواصير الموية المفتوحة بالشارع

من الملاحظات ايضاً الهدوء

عندهم هدوء موحش ! حقيقة وليس مبالغة , وكنت اعاني منه
بالليل على الساعة 12 وحولها لو اذن ديك على بعد 10 كيلو سمعته ! فلا سيارات ولا مكيفات ولاشيء نهائياً
ياشيخ لو كح واحد بالحي االلي ورى حينا سمعته كأنه جنبي
ما اسمع الا صوت ازيز اذني ودقات قلبي
والكهرباء ولايوم عدى من جيتهم ماطفت ! وليتها ساعة ساعتين , ممكن يعدي النهار كله والليل بدون كهرباء عادي
اغلب المحلات والاشياء المهمة تستخدم المولدات الكهربائية الاحتياطية الخاصة