جوابات الاسطى حراجى القط

جوابات الاسطى حراجى القط العامل بالسد العالى لزوجته فاطنه

عبد الرحمن الابنودي

الجوهرة المصونه

والدره المكنونه

زوجتنا فاطنه أحمد عبد الغفار

يوصل ويسلم ليها

في منزلنا الكاين في جبلايه الفار


أما بعد ..

لذا كنت هاودت كسوفي ع التأخير

واللهى ماكنت حاخُط بيدى حرف

سامحيني يا فطنه ف طول الغيبه عليكم

وأنا خجلان .. خجلان ..

وأقولك يا زوجتنا أنا خجلان منكم ..

من هنا للصبح ..

شهرين دلوقت ..

من يوم ما عنيكي يا فاطنه ..

بلت شباك القطر ..

لسوعتي بدمعك ضهر يديَ

لحضتها قلت لك :

(( قبل ما عوصل عتلاقي جوابي جي ... ))

نهنهتي .. وقلتي لي بعتاب:

(( النبي عارفاك كداب ..

نساي....

وعتنسى أول ما عتنزل في أسوان .. ))

ما عرفت ساعتها يا مراتى اضحك والا ابكى

ما عرفت ساعتها اذا كنت باعوز القطر يقف والا يولى

حسيت بعنيكى الحيرانه يا فاطنه بتقوللى .....

وتسكت .

وتقوللى ....

حسيت واليد بتخطفها يد الجدعان

بالقلب ف جوفي ما عارف ان كان بردان .. دفيان

والبت عزيزه والواد عيد

قناديل في الجوف .. زي ما بتضوي .. بيقيد ..

.......... والقطر إتحرك ..

وقليبي بينتقل من يد لإيد .

والقطر بيصرخ ويدَودِو

اتدلدلت بوسطي من الشباك ..

( خذي بالك م الولد ..

راعي عزيزه وعيد )

والقطر صرخ ورمح لكإنه داس على بصة نار ..

ولقطت الحس قريب .. قد ما كنتي بعيد :

(قلبي معاك يا حراجي هناك في أسوان ..)

...........................

ورميت نفسي وسط الجدعان ..

وبكيت ..
وبلدنا اللي كنا بنمشيها ف نص نهار

كان القطر في لحضه .. فاتها بمشوار .

سامحيني يا فطنه على التأخير ..

ولو الورقه يا بت الخال تكفي

لأعبي لك بحر النيل والله بكفيِ

كلام .

وختاماً ليس ختام ..

بابعت لك ِ

ليكي ولناس الجبلايه ولبتي عزيزه والواد عيد

ألف سلام

زوجك ...
لوسطى حراجي

ملحوظه

اكتبى ع المظروف

اسوان

زوجك الغالى

لوسطى حراجى القط

العامل فى السد العالى