موت الضّمير أعظم من الموت ذاته = واصعب من البلوى وعمق الجراحي
ومَن يضيّع مذهبه في حياته = يبقى بلا عزوه وهو بيننا حيّ
والّلي يدوّر عـزّته فـي شتاته = يبقى على طول المدى ما دنا حيّ
سنين عمره وهو عايش بلذّاته = ماهمّ قلبه وش الّلي جاي وش راحي
ما همّني فيه شيّ من بداياته = والقلب ما عاد له نشوه ولا افراحي
ما يجمع الشّمل جاهل من جهالاته = وما ينبني بيت من بعد الولـِفْ راحي
ومَن يفلت الحبل يندم بعد فلتاته = ما يكسب المعركه لو بيده اسـلاحي
والسـّرّ في سيرة المسلم ونيـّاته = ما تقبل النـّفس له زلـّه وهو صاحي
أسابق الرّيح وادري عند جيـّاته = يدافع الرّيح لا قايم ولا طاحي
أحسّ بالوقت يبطي عند روحاته = واحث بالسّير خطوي عند مسراحي
وآعالج القلب من جرحه ونزواته = واصبّر النـّفس بعد الهمّ واتراحي
صابر وساكت وعارف كـلّ زلاّته = واصبح أنا المتـّهم والسـّرّ ما فاحي
يا منزّل الرّوح بالقرآن وآياته = تحفظ لي الدّين في صدري مع اشراحي
وقوّ ي صبري على همّي وحالاته = لو كان جرحي بطعن الهمّ وارماحي
وخلّص آبو محمّد من بليـّاته = وقابله في جنان الخلد بالماحي