هلابك يا قصيد ما انحصر فاللحن والموال= على قول وفعل وادراه فالافكار واصونه
عن هزال الهجوس اللي بعضها صدق ما ينقال = ما تحوي من بنود الشعر كود اسمه مع إلحونه
حشمتك ياقصيدي عن قلال العرف والجهال = ولا اقارنك مع هزل القصيد اللي يقولونه
لجل عينك ولجل ارضاك بأعلن عنهم الترحال= ولا اهبّطك في سوق الرخيص اللي يهبطونه
باعدّك مع رجال شعرهم تضرب به الامثال = جزيل العرف وسط قلوبهم دايم يحفظونه
هل الراي السديد مكملين الوزن والمكيال = زحول علمهم لا من دعى الموقف يوفونه
صناديد مواقفهم تجمّل والرجال إرجال = يدلون الغوي للدرب والمايل يعدلونه
قصائدهم حكم تثبت على الاقوال بالافعال = تخلّد ذكرهم في كل ميقاف يمرونه
حموا قدر الشعر حد الشعر له فالنفوس إجلال = ما هاموا به كما من هام به لين ارخص إفنونه
لان الشعر ديوان العرب من ماضي الاجيال = تراث امه يحفظ امجادها وتصون قانونه
واذا كان الشعر جاله حراج وسائم ودلال = ترى عاره على شرايته واللي يبيعونه
ناس تبحث عن الشهره وترخص لجلها الاموال = لقوا فالشعر غاية قصدهم واللي يرومونه
وانا لي فالشعر وجهت نظر يا معشر العقال = حقيقة واضحه من كل عيب ونقص مضمونه
ولا باقايس اللي عن طريق اهل المعرفه مال = ضعيّف والضعافه قسمه وطبعه وديدونه
هبيل غايته يحجب شعاع الشمس بالغربال = لكن عوّد بغيضه ما استفاد وخابت ظنونه
ولا يمكن اجاري يالعوارف مثل هالاشكال = لكن واجب عليّ اعطيهم اللي يستحقونه
ولا بازعل ليامني سمعت من العلوم هزال = على قول المثل كل يجيك بشطر ما عونه
وانا اعرف واجبي واعرف حقوقي والدروب طوال = ولي قصد شريف ولا انثني واعود من دونه
عبرت بحور واجتزت الصحاري واعتنقت جبال = عسيره او يسيره ما ترد القلب عن شونه
اغامر والمغامر فالمواقف ديدن الابطال = قروم تقتحم حوض المنايا ما يهابونه
على منهاجهم اسرجت خيلي وانطح الاهوال = تدثرت بثياب العز والاوضاع مامونه
وصلى الله وسلم عد ايات الحشر والانفال = على اشرف من نصى البيت الحرام وطاف بركونه