هوه المراعي؟

كنت قاعد اتقهوى من ذاك البراد الاصفر ومستانس في ذاك البراد بعد العصر شوي الا واحد من الربع مقبل عليه يفح يالله فهمت منه كلمة سلام قلت خير وش وراك من يطردك قال ماحد معي لك علم قلت هسلم قال لاعاد تشتري لبن مراعي قلت يالطيف ليش طلع فيه سرطان قال لا لا زودو سعره قلت بكم صار قال زادوه ريال قلت ريال بس غريبه عادتنا لاارتفع شي اقل حاجه خمسه ريال والله ان راعي المراعي هذا نشمي قال اقول نشفوا دمك الدنيا قايمه عشان هذا الريال والجرايد والمواقع كلها تكتب تقل قاطعوا المراعي قلت عشان ريال قال ايوه خل لبنه يحمّض قلت طيب واللي زودوا الرز والسكر والشاهي والشعير لين عاد الطلي ب1500ريال هوه مانقاطعهم قال مدري هم ماقالوا الا قاطعوا المراعي بس قلت طيب واللي ضيعوا جده واغرقوها وذبحوا الناس نقاطعهم قال اقل اسكت لاتكلم بالسياسه قلت طيب وكيف نسوي عيش بدون لبن قال ماهلا المراعي زود قلت طيب ظنك المقاطعه تجيب فايده قال نشوف بعد يومين الا وهو جايني يسعى وله فحيح قال وش ابشرك به قلت هسلم خير قال راعي المراعي رد السعر كما هو شفت كيف دقينا خشمه قلت طيب وخشوم الباقين هوه ماندقها والا خشومهم فطس قال ياشيبة الجن المهم قالتنا مشت عليه قلت والله ماضيعنا الا القاله نشبنا عند المراعي ونسينا الباقين نمسك الدجاجه ونفك الجمل انا صح والا غلط؟

منقول من مقالات الكاتب الساخر (السيد غلط) موقع ومنتديات العقشان