في زمان الواو ضيعنا الحروف الابجديّه= كل حرف غير هذا الحرف ما نعرف مقامه
ارتدا ثياب المهابه والفخر والمقدريّه = ونال من بين الحروف اعلى مواثيق الزعامه
صار له قيمه عظيمه فالحياه الواقعيّه = والذي ينكر وجوده لا تسمع في كلامه
انتصب كنه زعيم القوم في وجه الرعيّه = فارض قدره على غيره بتمكين وصرامه
له وعود وله عهود وله مواقيف جريّه = وصار من فوق النظام ولا حد يغلب نظامه
ومثل ماله في طريق الخير وقفات وفيّه = يعطي اصحاب الحقوق حقوقها ما شي ظامه
له بعد على طريق الشر وقفات دنيّه = يسلب حقوق الاوادم غصب ويجرد حسامه
مرة يشفع شفاعة خير والنيه بريّه= وتنشر إله الرايه البيضا بجده واهتمامه
ومرة يشفع شفاعة شر والنيه مطيّه = وتنشر إله الرايه السودا وتغشاه الملامه
هذي طبوعه وذا وصفه ضحى والشمس حيّه = والله اعلم ويش حاله لا اجهم الليل بظلامه
ودام بامره كسب راع الجاه في حسم القضيّه = مالي الا انصاع له وافرض على النفس احترامه
مير وش ذنب الضعيف اليا غدا فالمهمهيّه = كان عجز الواو لا يعفيه من بعض الغرامه
والحقيقه يمكن ان بعض البشر يزعلى عليّه = كان ما وافق مرامي في بنى المعنى مرامه
لكن الواقع يبرهن والقضيه سرمديّه = والحقايق فوق تبرير الجهاله والغشامه