قلت الوداع و جاوبت دمعة العين= تجرح بساتين الخدود النديه؟؟؟
واغضت و شفت بعينها الحزن حزنين= وصاحت على الفرقا ... أنا مو قويه
وجاوبتها أرجوكِ تكفين تكفين= والله دمعك يشعل النار فيّه
وقالت تعاهدني عهاد المحبين= الله يخون اللي يخون بخويه
قلت ابشري واللي خلقك لاتظنين= حرام ما غيرك عشقت ادميه
وقصت شعرها قلت أنا وش تسوين= قالت أبي من غرتي لك هديه
ونادتني الغربه على الهم و البين= واحسب إن الايام روحه وجيه
غربة سنه في ذمتي غربة سنين= متى على الله يلتقي الحي حيه
ورجّعت شوقي في خفوقي براكين= ورجعت أنا كلي لها جاذبيه
وسألت ماردوا و أنا اصيح هي وين= وكل نثر داخل العين ميّه
وفي معمعة حزني تلقيت رمحين= قالوا ماتت ... غافلتها المنيه
وفي غرغرتها ماذكرت غير حرفين= تشهدت باسمك شفاة البنيه
صدمه وجابتني على الارض نصفين= شلون راحت دون ذنب و خطيه
تكفون دلوني على القبر هالحين= ما عاد فيني للصبر مقدريه
ووقفت اطالع قبرها بين نصبين= وجلست أضم أغلى النصايب عليّه
واصيح وش بك يا غلا ماتردين= اشتقت همس اشفاك النرجسيه
وش فيك جيت من السفر ماتهلين= ماهي بلك عاده ولا انتي رديه
وحاولت في لحظة جنون اجرح الدين= و ازيح تربة قبرها في يديه
وبالغصب شالوني حشا تقول مسكين= و اصرخ بهم ... والله والله حيّه
اقفت وتاهت بي جميع العناوين= و الحزن يلعب في داخلي سامريه
ورجعت لدروب الشقا قبل عامين= مدري من اللي فينا صار الضحيه