يرضيك يالحزن؟
محمد الدحيمي
حمـــامة الروض .. ولّي ياشقــــــاويه
مانيب ناقص مصابك .. يكفي مصابي
انا .. ماكـــوّدت اسجّ شـــــوي ياخـيّه
زدتيني بسجعتك .. زودٍ على مابي
الغابـيه غابيه .. بالصــدر مكمـــيه
وانا مانيب مهــبولٍ يفضـح الغابي
اخاف من روحتن ماعقــبها جـــيّه
يومٍ به اللوم .. يشهق شرهة عتابي
خاسي وهابي .. مجازي الطيب بالسيّه
راعي الرديّه رديّ .. وخاسي وهابي
في نحو (ابو الأسود الدؤلي) .. له نحيّه
ذا النحو نحوي انا .. وإعرابه اعرابي
ترابي اولى بي .. ان خابت هقاويه
وأن عوّدت للتراب .. ترابي اولى بي
هذا ترابي . . وأنا زبن الجــــلاويه
وكنـــوز قارون ماتشـــريك يا ترابي
سقــوى .. سقاه الحيا وقتٍ مضى ليه
يوم الرخا محزمي .. وزهابي .. زهابي
يوم ارضي المســقوي عالوسم مذريه
ودون اللحى فرخ بلجيكٍ وشبّابي
يوم إنّي اغمض مريح البال جفنيه
قبل السهر تستبيح جيـــوشه اهدابي
من قبل ماشوف وقتٍ دارت رحيّه
وضيوف (بقعا) سرى .. وقفوا على بابي
وقتٍ ليا ضحك نابي جات بلاويّه
كنه حرام علي الضحـــــكة بنابي
قد لي خـــــلاوي 8 سنين .. وشويه
هذا .. وانا لاني بمجــرم ولا ارهـابي
احدن بكى ميته .. واحدن بكى حيّه
واحدن على الصدق عاش ومات كذابي
احيان .. أهيجن وأغني للهــــواويه
وأحيان .. كل الهــــــواويه تغنّى بي
واحيان .. احصّل لي من القايله فيّه
وأحيان .. من حرقة القيض الله ادرى بي
رهنت لي بندقٍ .. في دين جنبـيه
وش يآخذ المرتشي من ذمّــة.. مرابي
ظامــي وورّدت بـيرٍ دونها الحــيّه
الله يجــازي زماني ويش سوّى بي
رزقي على عالمٍ جهــري وخافيهّ
ومن مثل ذا الجود رزاق ٍ ووهابي
وين انت يالحزن ؟!! يا اجمل غناويـه!
أذّاني الهم بغــيابك وشقّى بي
من بين غيـّابي ابطت بك حراويه
فاقدك .. ياأعزّ غــايب بين غيـابي
وين انت ؟!! ياصاحبٍ ماولفني زيّه
ياقو قلبك! .. تخلي الهم يسلى بي؟!!
ودّه اشقق ثيــابي غصب بإيديه
والله لأمــــوت .. ويدي ماشقّت ثيابي
ودنيا الهبا .. ســـوّّد الله وجهها فيّه
أبرد صــودايفها .. ياما احرق اعصابي
يرضيك بالله؟!! تبـــيّت بي على نيّه
قبل اتعشى لياليــــــها . . تغــدا بي؟!!
هيّا تصدّق !! كذا . . وبدون ماريه
اســتنزفت كلّ جرح ٍ . . قد تخبّا بي
خلتني أهجّ واعطي الخبت . . رجليه
والعجّ راح بصميلي .. وأذهب ركابي
ثم ادرجت بي مهامــــية الزرّاجــيه
وجت بي وأخفّ الطعون .. شلاف وجنابي
يرضيك يالحـزن!! . . ياتالي عزاويه
تضحك على شيب راسي .. بين شيّابي؟
يرضيك يالحـزن؟!! تجهر بي عــلانيه؟
حتى تهـاون بحـالي اقرب اصحابي؟؟
وجدي وجود اجــــوديٍ صار عاريه
هذا وهو من ولد .. عتّاق الأرقابي
وجود محــــكوم ماقبلوا منه ديّه
وخلوه مابين سيف ونطع ونصابي
كلن تتقى طعـــون عــداه غدريه
وأنا الوحيد اللي طعوني من احبابي
وأن مت .. قولوا لفاقــدني وداعـــيه
والله ماني ردي .. وقــــتي تـردى بي