بعد العيد بمساء احد الايام اشار الخوي بفنجال قهوة من البُنة كمايسمونها بأحد مقاهيهم المشهورة , فذهبنا وتوقعت ان مقاهيهم مثل مالدينا , اقصد شيشة ومعسل
لكن تفاجأت بالخوي يقول الشيشة هنا ممنوعة ! ويعتبرونها من المخدرات , هي والقات ايضاً ! عكس الدول المجاورة اثيوبيا وجيبوتي واليمن ...
دخلنا المقهى وإذا به عبارة عن جلسات مثل المقاهي المتعارف عليها لدينا
كراسي وطاولات من الخشب والجلد الطبيعي
والاضاءة به خافته جداً , بالكاد ترى ما امامك
وهذا مكان الحجة اللي تسوي القهوة
ويتضح نوع من النباتات منثور بالمكان يشبه البرسيم او اعواد النصي البري لمن يعرفه
لا ادري مالهدف منه ولما وضع
علماً بأنني سئلت الخوي والحجة ايضاً ولم احصل على جواب مقنع
اللهم كنوع من طقوس القهوة او العادات القديمة لديهم
طلبنا القهوة وتوقعتها جاهزة
ولكن جلسنا اكثر من ساعة حتى تم تجهيزها !
قامت بالبداية بحمسها حتى عج المكان برائحتها الزكية
واثناء استرسالي بالحديث مع الخوي تفاجأت بالطيب او البخور يقترب مني
فقمت بحركتنا المعتادة بسحب الدخان بيدي إلي
لأكتشف ان الحجة جايبة القهوة بالمحماس ! حتى نعطيها رأينا بالحمسة
اما نكتفي بحمسها كما حمستها , او نطلب حمسها اكثر لو اردنا
قلت للخوي قلها تمام بس نخلص , لأنها طولت مرة
بعدها قامت طويلة العمر بطحنها , فحمدت الله ان عندهم طاحونة ولا كان جلسنا ساعة ثانية ننتظر النجر
حطت قهوتها بالبريق وقامت تطبخ يمكن نصف ساعة , ثم فرغتها بدلة تشبه الجره جابتها وحطتها قدامنا
ننتظرها تصب عاد ماصبت
اثاريهم مثلنا لازم يخلونها تركد شوي
بهذه الاثناء جابت البخور وطيبتنا , ثم وضعت البخور
بعدها صبت لكل واحد فنجال وقربت السكر ومثل القمح المحموس , قهوتهم تشبه القهوة التركية محموسة زيادة
شربت فنجالي الاول واكتفيت , قال الخوي ترى لازم ثلاثة فناجيل !
ياولد عدل بدل قال لازم ثلاثة !
واذا بتبين لها ان القهوة مضبوطة , زود فنجال ولاثنين
وفي كل مرة اخلص فنجالي تجي وتصب , ونا اقحن لين كرهوني بالقهوة 
خلصنا وطلعت استكشف المقهى
واذا الغالبية متجمعين حول التلفزيون يتابعون مسلسل مصري !
هذي لاحظتها كذا مرة بارتيريا
تلقاهم متجمعين يا على كورة او مسلسل ومتحمسين بالمتابعة
مدري وش سالفتهم لاشغلة ولاعملة
على فكرة سمعة السعوديين هناك مش ولابد
بسبب شلة من زمان كانو بالسفارة قبل يمكن خمس سنوات
ماخذين فيلا وقالبينها خبيتي حسب ماسمعت
وكل يوم مسببين مشكلة
عكس القطريين لهم حظور وسمعتهم حلوة , ورغبتهم الاولى دائماً بالسفر لقطر دون غيرها
ومن المفارقات ان دولتهم تشجعهم على الهجرة ! لأنها تحلبهم صح
بأخذ ضريبة 3% من رواتبهم , وكنت اعتقد ان غالبية هجرتهم لنا بالسعودية ودول الخليج تحديداً , واذا بالاكثرية باوروبا المانيا وبريطانيا وايطاليا واسبانيا ..
على ذكر الضرايب , بيوم رحت مع الخوي نصرف من السوق السوداء
فصرفنا الريال بـ 11 نقفة , بينما سعر الصرف بالبنك 4
قلت للخوي ورى ماتاخذ الفلوس من السوق السوداء وتروح تصرفها بالبنك
بمعنى تصرف الريال بـ 11 ثم تروح تعطيهم فلوسهم وتسترد الريال بـ 4
واذا ماعندهم ريال خذ دولار بـ 15 وارجع اصرفه بـ 40 بالسوق السوداء
حاولت افهم الخال مافهم ولا استوعب , او انه فاهم ومتخوف
عموماً لو طبقها مكسبه اكثر من 100%
مع كثرة انقطاع الكهرباء , اكتشفت شموع عندهم مجنونة
اذا ولعتها تجلس 12 ساعة متواصلة ! لاويقولون لو حطيتها بالثلاجة قبل الاستخدام تجلس 24 ساعة مولعة
قلت مادام كذا خلني آخذ منها كرتون للبيت وهدايا
وهذي صورتها
ايضاً وجدت افضل انواع الجلديات بتراب الفلوس
فاشتريت وقشيت لين قلت آمين
جاكيت شاريه بـ 2000ريال , لقيت اخوه طبق الاصل بمايعادل 180 ريال !
بالاضافة للمحافظ والشنط والاحذية والاحزمة الفخمة بأسعار متدنية للغاية ..
هذه صور متفرقة من اسمره
الصورة الاولى لأحد الشوارع
وهذه صورة لنوع من السيارات لايتم الزواج والزفة إلا فيها
كنوع من العادات عندهم
يعني ممكن ينسى العروس بكبرها ! بس يستحيل ينسى يستأجر السيارة هذي
يجلسون يفرفرون فيها طول اليوم لين يدوخون
وهذي صورة لتقاطع العليا مع التحلية
وهذي صورة للفندق الوحيد بارتيريا ذي الخمس نجوم
اسمره بالاس
على فكرة لايوجد نجمة ولا نجمتين ولا ثلاث ولا اربع
ختاماً ومن المخالطة
ولعلها تصل لمن يهمه الامر
علمت ان مركز انطلاق مخالفي الاقامة من افريقيا عموماً , ومن السودان وارتيريا واثيوبيا والصومال وجيبوتي تحديداً
من مدينة سواكن بالسودان ومن جيبوتي
واذا تم تسفير اي عمالة من اي دولة ذهب الشخص للدولة المجاورة وحصل على جوازسفر جديد بقيمة لاتتعدى 500 ريال وقدم بجنسية جديدة , حتى لايكتشف امره بالبصمة , لأن تشييك البصمة كما هو معروف على الجنسية , يعني الجنسية اثيوبي يشيكون على الجنسية الاثيوبية ! بينما جنسيته الحقيقية ارتيري ! وتم تسفيره سابقاً , وهذه ثغرة كبيرة وخطأ فادح بالنظام , يجب حله سريعاً ليشمل البحث كل الجنسيات , وليس كل جنسية على حده كماهو معمول به الان !! هذا في حال رغبته بالقدوم بصورة قانونية
اما ان لم يجد تأشيرة فيكتفي بالحصول على جواز دولة اخرى , ويتم تهريبة اما من سواكن او من جيبوتي
وقيمة تهريبه الى الرياض مع الحصول على اقامة نضامية ! 1500 ريال
اما التهريب الى الرياض والحصول على بطاقة احوال نضامية 2500 ريال
اقصد بالاقامة والبطاقة النضامية , انه يحصل عليها ويقومون بتغيير الصورة فقط , يعني يشيلون صورة صاحبها الاصلي ويضعون صورة مخالف الاقامة بطريقتهم
فإذا تم التشييك برقم البطاقة او الاقامة تكون نضامية بينما الصورة تم تغييرها !!
الغريب ان المهربين لا يتقاضون شيء حتى يصل الشخص الى الرياض او المدينة المرغوبة !
محفول مكفول
فإذا وصل اتصل بمعارفه ودبروا المبلغ له
والمشكلة الاكبر ان الشخص عند تهريبه يعمل من مبدأ خاربه خاربه , فيحمل ويهرب معه كمية من المخدرات او الاسلحة
على كذا انتهت الرحلة وإن كنت اختصرتها بعض الشيء
فغادرت اسمره الى صنعاء
وهناك قابلت المجهولين من مخالفي الاقامة الذين يتم تسفيرهم لليمن ثم يعودون مباشرة بمجرد خروجهم من المطار!
العدد كبير طائرة كاملة يومياً حسب ماذكر لي موظف المطار
ولكني صورت جزء منهم بسبب وجود نساء بالجهة اليمنى
ثم التقيت بعدها بأهل موظفي شركة المراعي , القادمين من اسمره
ولسان حالهم يقول لاتسعودون الوظائف نحن احق بها من شبابكم
فزادت نقمتي على المراعي اكثر واكثر , لأني مقاطعها بالاصل , ولاهو اللي بيزود كرهي لها
