يوميات البريهة ( 17 )
شقحه مغتاضه
البارح ياحباني يمكن نص من الليل لا ون الباب يدق ...وأول من استقعد جدتي متعبه وقالن يالله ليل خير ..فك آبي الباب لا ونها شقحة بنت قحيقح وعدن وانحن نقل يالله اجعله خير واشجاب شقحة في ذالليل ...
شقحة تيه نكحن واحد صروي ومعها منه خمسة جهلة ...ويوم جن لا ونها وحدها مامعها ولا برتوع ...
بعدين جدتي متعبه قعدن معها ونشدنها قالن آنا تعت عندكم عشان أهلي بعد ما تاعوا من مكة قالن الله يحييك ياشقحة ما بياجينا خير منك..
المهم المخلوقة تاعن مغتاضة والسبب كله من عمتها أم بعلها وهيه من الكهيل اللي الواحد يتمنى ان الله ياخذ وداعته ..من يوم نكحن شقحة وهيه تشتكي منها تاهب الميرة كلها في عينتها ..وكل يوم تخرج لشقحة حق صاصه وصفح رز ونقس بصل وفنجان زيت وشوية ملح
وتقلها اطبخي الغدا ياشقحة ...وصبرن الضعيفة عشان بعلها طيب ولا قيد أخطى عليها وقالن باصبر عشان جهلتي وقعدن السنين تيه كلها وقالن عسى الله يفرجها والكهلة تخرج عليها في كل شي ...والولد مقوده مع أمه ..
والغدا كل يوم شكل: يوم رز ونتفتين لحم ويوم رز ونص ديكة ويوم رز وتونه ويوم رز وصاصه
ويوم معدوس ، والفال والعشا ماشي الا قرصان ومعرق واوقات حقينة والضعيفة تملخن جنوبها من المطحنة.
ولكن من اسبوع تغيرن الكهلة وزودنها تقوم من الفجر وتصك الكنديشن على شقحة وجهاليها
ولا تخليها تغسل في الغسالة وتقل ليش يمه في ايديك حنا ولا تخليها تحوق بالمحوقة الكهرباوية
ولا تخليها تتفرج فالتلفزون ..وتقل الفاتورة حقة الكهرب سون مصروف جديد ..وآنا ولدي ضعيف وآخر شي خذن جوالها وسحبن التلفون عنها وانتقلن التلفزون وهبنه في عينتها ...
وحلفن شقحة ما عد تقعد ...قالن الكهلة في ثمها وخذي جهلتك معك قالن والله ماخذهم ماخليهم الا يرحون فوق قلبك ...وعود الضعيف ندرها ويوم مالقين أهلها تاعن عندنا وانحن في حرى
ان اهل المخلوق ياجون يشفعون وقال آبي ان كان جا مالك الاآخذلك الحق من ظهره طابق مطبوق واشترط لك رضوة ماقيد ضلن ...ولكن أول باستشير آبوك ...
عاد انحن في حرى الرجال يجي يشفع واعلمكم
منقول.......
يتبع........
.