بالهون يا متعب قوايمك بخطاك = ما تستطيع الرجل تلحق هقاويك
ارفق على نفسك ودربك وممشاك = تعب القدم والدرب واللى يباريك
يا شيخ هون خطوتك لا عدمناك = معذورة كان الرجل ما تماشيك
سبحان من سمح طريقك وقواك = درب الوعر تمشيه والله يقديك
يا ساعياً للمجد والمجد يزهاك = المجد يا سلطان في كف اياديك
سمعتك طارت من ثرانا بالأفلاك = شمس يسير بنورها من حواليك
ان غابت الاخلاق تبقى سجاياك = واذا انتهى المعروف يبقى الكرم فيك
اسمك على فعلك يتوج مزاياك = سلطان خلانك وسلطان أعاديك

تغنت طيور أبها ومالت غصون الريف = ولبس الجبل غترة بياض من مزونه
سرت في الروابي فرحة مالها توصيف = تبسم بها سلطان والخير مكنونه
تشرفت بزيارة قروم العرب تشريف = هلا بالذي كل المراجل يرومونه
ترى العز بالجمعا ومن شذ راح ضعيف = ويمنى بلا يسرى بالاخطار مرهونه
إلين اجتمع راي صويب وحد رهيف = ترى كل من راوز حماكم تردونه
عملكم ظهر والهرج من غيركم تطفيف = يقولون لكن ما حصل ما يقولونه
صدقتوا نجحتوا وارتفعتوا عن التسويف = عسى الله يوفقكم على ما تريدونه
أحاول أجاري شاعر المجلس الحريف = وارد التحية مثل ما جات موزونه
أروح عن اللي صابته شارة الهديف = رماه الشطير اللي تركد على هونه
أبا أنصحك يا محمد تجي حزة التصييف = وعلى سنة الله كل شي تدركونه