لا هنت يا راس الرجاجيل لا هنت=لا هان راس في ثرى العود مدفـون
والله ما احطك بالقبر لكن امنـت=باللي جعل دفن المسلمين مسنـون
منزلك يا عز الشرف لو تمكنـت=فوق النجوم اللي تعلت على الكون
سكنت دار المجد يا شيخ واسكنت=شعبك معك في منزل العز ممنـون
صنت العهد يا وافي العهد ما خنت=علمتهم وش لون الأشراف يوفون
كم ظالم عاداك واعفيت واحسنت=واخلفت ظن جموع ناس يظنـون
شلت الأمانة حافظ مـا تهاونـت=شفنا بك رجال على النفس يقوون
يا اللي طلبه الملك بالحـب زينـت=عرشك بتاج قلوب شعب يحبـون
لونت تاج الملك ما قـد تلونـت=ما غرتك دنياك ما صرت مفتـون
بالزهد والمعروف والصبر كونـت=منهاج فيصل منهج اللي يعدلـون
تلفتت روس المخاليق ويـن انـت=وين العظيم وعود الشوف مطعون
كم خافق وقف عقب ما تكفنـت=وكم ناظر ذوب سـواده محـزون
لو شفت حال الناس عقبك تبينت=مقدار حب الناس للـي يـودون
مما بقلبي قلت يا بـوي لا هنـت=والا انت فوق القول مهما يقولون