مسك ختام الحفل الخطابي
قصيدة للشاعر عبدالله مسفر رمزي
سلام وتحية وما العايدينا .
يارب تجعلهم من الفايزينا .
وبخير وسعادة طوال السنينا .
ووفق احبابي في العسر واللين
ليش القلم ياشيخ مرفوع عنّي .
مانيب جاهل باقي صغير سنّي .
ولا نيب لا نايم ولا نيب جنّي ..
وانا واياك اولاد سبعه وشهرين
الله يا محلى الجماعة في العيد.
الكل فرحاناً ومبسوط وسعيد .
وطول السنة عايش عن العالم وحيد ..
واليوم جالس بين كل المحبين
تحية الساحات للي دعمها .
انتم غنى الساحات وانتم .
دسمها هي روحكم وانتم لحمها ودمها ..
هي وردة البستان وانتم رياحين
ودّي اقدم شكر لو تسمحوا لي .
لكل من جا الحفل والتف حولي .
الكل في فرحة وما حد زعولي ..
الله يديم السعد ما بيننا البين
والشكر للي كان خلف الكواليس .
اللجنة اللي هم من اهل النواميس .
تعمل بصمت ودوم ما طاعوا ابليس ..
الله يوفقهم معي قولوا امين
ياما اجتمعنا لجلكم في ليالي .
كلاّ يدير الشور مانا لحالي .
والغالي اللي مثلكم دوم غالي .
يبشر وحنا خير فزاًع ومعين
والشكر للدكتور بوعالي سعيد .
عا الجائزة اللي بها توّج العيد .
للي حفظ قرآن وأحكام تجويد ..
ما يحفظ إلا اللي معه قلب وفطين
وانا بغيت احفظ كما الناس وأفوز .
لكن عقلي رايحاّ منه الأفيوز .
ولا حفظت إلا لتوحه وفيروز ..
عجزت لأحفظ سورة الكهف والتين
فكر معي ياكل عاقل وواعي .
وش رايكم نعمل زواجاً جماعي .
والله يالتبذير ما منه داعي ..
بادخل عليكم لا تقولون بعدين
اسوة بمن هم حولنا من قرانا .
دار الجبل والغمدة هم كمانا .
وانتم كبار المجتمع واشورانا .
ذا مطلبي وانتم نظر داخل العين
باشكي عليكم مشكلة ما المشاكل .
والمشكلة عندي عليها دلايل .
ويش البصيرة ياعيال الحمايل.
الجن في بيتي معايه مقيمين
في غرفتي ساكن ثمانين جنّي .
النور والمويه مع الغاز منّي .
مرات ادرسهم ومرة نغني ..
من شاف مجنونا يدرس مجانين
اسمع لهم هوشة مع تالي الليل .
تحاذفوا ما بينهم بالفناجيل .
بغيت اقوم افزع وما عاد بي حيل ..
من صيحهم وقف دمي في الشرايين
وشيخهم جاني بعكاز محني .
في خاطري باصيف واثره لمحني .
عودت ارحب به وهو ما سمعني ..
وإلا وهو يقرا تبارك وياسين
وقلت من أي القبايل من الجان .
وقال حنّا جن من جن سليمان .
جينا نبارك لك بسامي وسلطان ..
حنّا ضيوفك بعد كنا مساجين
رحبت بالضيفان واكثرت ترحيب .
ناظرت والا واغلب اللي لفوا شيب .
وجيت باطردهم ولا ونها عيب ..
وانا لوحدي كيف بطرد ثمانين
ما ادري وش اللي صابني من بلية .
من قبلهم كانت حياتي جلية .
جيبوا لي افضل شيخ يقرا عليه .
ساهر بطول الليل والناس ممسين
انا وياكم قد بنينا عمارة .
والكل ساهم فا البنا عن جدارة .
والناس عرفوها وسارت منارة .
ساحات وادينا لها اربع سنين
لابد نكتب ما يسر المشاهد .
وندري إن الله عليماّ وشاهد .
وكل يوم احبابها في تزايد .
زوار ساحتنا تعدّى الملايين
ساحاتنا خضرا وفيها الحيا طاح .
والكل يتكلم يقل وردها فاح .
هي مطلبي هي راس مالي والأرباح .
يوما بعد يوماً وحيناً بعد حين
وش حد ابو سامي في القيل والقال .
خلوني اقضي باقي العمر رحال .
وين الذي يشري معي راحة البال ..
يحجز معي رحلة على ام الجناحين
إن كان جا منّي خطا سامحوني .
وإلا فدلوني سوا وانصحوني .
وانا ولدكم لو تبو ترسلوني .
آسافر المغرب ولا سافر الصين
انا في الساحات ساكن وبا قيم .
وجونا صافي ولا بـ السما غيم .
وختامها منّي صلاة وتسليم ..
على حبيب الله سيد النبيين
***
ثم اختتم رئيس اللجنة الثقافة والإعلام الأستاذ صالح بن عوضة الحفل الخطابي
ودعا الجميع لتناول طعام العشاء