ابتداء للعز ميلادٍ فريد = واشرقت شمس الريادة من جديد
جاء معزي يرفع النصر المجيد = وجمّع الامه عقب ما هي الشتات
بالف وثلاث مئه وتسعة عشر = انتفظ راع الزعامه والفخر
عبدالعزيز الامام المعتبر = واشرقت انوار عز مبهجات
سار من صوب الكويت مع اربعين = موجهين للرياض ومنتصين
وصبّحوا عجلان فاليوم المكين = وراح عجلان وزماميله رفات
ثم معه اهل الجنوب من الرياض = ادخلوا فالحكم من دون اعتراض
وبايعوه ومعه ساروا فالفياض = يلطمون اهل الوجيه المغضبات
وبعدها هيمن على الوشم وسدير = وفر ابن رشيد فاليوم الكبير
واذعنت للقايد الفذ القدير= وبادت اطماع النفوس اللاهثات
واتجه يقود جيشه للقصيم = يسالم اهل السلم ويبيد الخصيم
ولاذ ابن رشيد بالطبع القديم = وانهزم منها بدون مقاومات
وصار في روضة مهنا ما يريد = وثبّت الله خطوة الشهم الفريد
وقتل فالميدان خصمه بن رشيد = بضرب شابية السيوف الصارمات
ثم وجه قوته صوب الحسا = واقتحم سور الهفوف وبه رسى
وبايعوه الناس في ذات المسا = وانتهى ظيم السنين الفايتات
وبعد ذلك ظم حايل في حماه = واسلمت له بالسيوف وبالرماه
والتجى له شيخها يبغى النجاه = ثم رفع عنه الزعيم اللايمات
ثم واصل فالتقدم والمسير = لين صبّح ال عايض في عسير
ويوم حجلا زفت النصر الكبير = انطفة نيران ظلم وارِيات
واعتزى به بن لؤي ضد الشريف = وفالخياله التقى قيف بقيف
وانتصر بالسيف فاليوم الكليف = رغم قوات العدو الضاربات
ثم للطايف توجه بالجموع = واتجه لْمكه بجيش يروع
وانتحى عنها الشريف بلا رجوع = شارد ظمن الجموع الشاردات
واقتفت اثاره جيوش السعود = عبر جده والمدينه في سنود
لين عدّوه الطوارف والحدود = ولا بقى له فالوجود مغامرات
بعد ذلك صوب جيزان انتحى = وراح الادريسي كما حب الرحى
اسلم وسلّم وقفى وانتحى = واصبحت كل الطوارف وامنات
هذا هو عبدالعزيز ابن سعود = فارس ما صار مثله فالوجود
صامل الوقفات والفعل محمود = قايد قاد الحروب الطاحنات
سل سيفه وامتطى ظهر الجواد = ينطح الغارات في يوم المعاد
بالفوارس والذخاير والعتاد = فوق صلفات الجياد الراكضات
فيصلي فالمواقف فيصلي = لا بدا في كل موقف جمّلي
خصمه بيوم الطراد مجندلي = جامع كل الصفات الفارعات
قاد نمرا شيّبت روس الرجال = ما حد ياصل مواصيله محال
يجدع اطوال اللحى يوم القتال = بالرماح وبالسيوف الفاتكات
به تليق احلى الوصايف والنعوت = والملاحم والقصايد والبيوت
اشعل انوار العداله فالخبوت = بعد ماهي بالظلايم حالكات
وانتهى عصر المغازي والحروب = وبادوا الانذا قطّاع الدروب
ولاذوا ارباب الحناشل بالهروب = واصبحت كل الخلايق وادعات
واستتب الامن في كل البلاد = وانقضى وقت التناحر والفساد
والعدى راحوا كما اسراب الجراد = كنهم شرد الوحوش الجافلات
صبّح الديره وهي ظلم وظلام = لا شريعه لا حكومه لا نظام
والعشاير مستبده فالخصام = عايشين في غدر ومشاحنات
القوي بسلمهم ياطى الضعيف = علمهم ما بين رمح وحد سيف
يومهم بكل حالاته مخيف = والليالي بالجرايم موحشات
اسس الدوله على الشرع القويم = وجمّع الامه على النهج السليم
وامتثل له كل افاك اثيم = بالسيوف وبالخيول الرامكات
ثم بدا عصر الحضاره والنهوض = وقام حظه عن رديين الحضوض
واضح الحجه بلا زيف وغموض = وانتهت كل الامور الغامضات
نسأل الله يرحمه فانه رحيم = ويحفظه من هول نيران الجحيم
ويجعل مسكانه بجنات النعيم = في ظلال نعيمها اللي وارفات
وبعد موته قلّد المنصب سعود = وقادها لاعلى المراتب في صعود
يبذل المجهود في كل الوجود = وارتقت لاعلى الشعوب الراقيات
ثم فيصل فيصل السيف الصروم = الشجاعه والسياسه له تروم
الزعيم اللي به تقوم العزوم = فارس فيه المزايا النادرات
ثم بعده خالد الشهم الحليم = صاحب الراي المسدد الحكيم
المليك العادي الحر الكريم = حاوي كل الصفات الفايقات
ثم فهد فهْد الفهود النادري = السياسي الفريد الماهري
سيّس الدوله بفكرٍ باهري = وحل عسرات الامور المبهمات
ثم عبدالله عسى عمره طويل = الزعيم العادل الحر الاصيل
ابو متعب راعي الفعل الجميل = حاويٍ كل الصفات النايدات
قايد الامه الى بر الامان = باذل جهده لها سر وعلان
مخلص مع امته في كل شان = وملجم افواه الكلاب النابحات
السياسه من لها غيره يسوس = والامم من حكمته تاخذ دروس
والدول تلجي له بيوم النحوس = لا تنصتها الامور الطاميات
صاحب الراي السديد الحاسمي = الحكيم بكل علم فاهمي
سيفنا اللي بالاعادي واسمي = صقر يصيد الصقور الصايدات
ومعه ابو خالد على الايمنى سنيد = صامل الوقفات والراي الرشيد
العضيد الوافي الشهم الفريد = وبالعطا يغني اليدين المعدمات
ونايف اللي بالمواقف نايفي = كلٍ بمجهود نايف شايفي
في جنابه يامن اللي خايفي = ساهر وعيون غيره نايمات
وفي ظلال ملوكنا حنّا بخير = هم ذرانا لا دعى اليوم الكبير
وحْنا معهم فالمواقف ما نحير = وحبهم بين الضلوع المهدفات
جدوا وْجادوا طويلين الذراع = وصيتهم بالعدل والانصاف شاع
قادوا النهضات في كل البقاع = والقرى مثل المداين ناهضات
نهضةٍ عمّة جميع بلادنا = وارتقينا للامام بلا دنا
نحمد اللي بالعطايا زادنا = من فضايله الجزال الزايدات
للحرمين الشريفين اهتمام = معتنين بها رفيعين المقام
باذلين الجهد من عهد الامام = وطوّرة باعظم وبارقى التوسعات
في مجال العلم حاربنا الجهل = ونافسنا بالمعرفه كل الدول
المدارس والمعاهد بالجٌمل = وشيّدت في كل صوب الجامعات
وللصناعه فاتحين ارقى المدن = تحتوي بانتاجها من كل فن
منتجات ما تقدر بالثمن = نادرات فالوجود وفاخرات
وللزراعه ما انتوانا بالجهود = والصحاري صارت ازهار وّرود
وفي جمع الاوديه بنيت سدود = والبحار بها تقام التحليات
وفي مجال الصحه اذهلنا الامم = وارتقينا في منيفات القمم
وانقضى عصر المتاعب والسقم = وفتحت بكل القرى المستشفيات
والمواصلات صارت بازدهار = واكبت ركب الحضاره بافتخار
ورْبطة خطوطها كل الديار = وعبرت روس الجبال الشاهقات
وفي مجال الامن فزنا بالرهان = والمواطن عايشٍ بامن وامان
ما يضيم ولايضام ولايهان = وقطْعت يْدين الجناه السارقات
والجيش اللي يحمي حْدود البلاد = من هل الاطماع واصحاب الفساد
طوّر بروس النشاما والعتاد = واليات من جميع التقنيات
والتجاره راس مال ومفخره = قوّة اقتصادنا اللي نذخره
السفن عبر المواني مبحره = والبضايع واردات وصادرات
نعمة من ربنا جل وعلا = نحمده ونشكره رب الملا
ونعلن لْملوكنا كل الولا = الكرام اهل اليدين المصخيات
كم لهم من فضل على المسلمين = منفقين بكل وقت وكل حين
وللارامل واليتامى كافلين = وامسحوا حزن العيون الدامعات
الله يحفظهم لنا طْوال العمار = هم لنا القادات واصحاب القرار
نفتخر في حبهم سر وجهار = الحصون اللي علينا مظللات