يوم هلّت دموعي ياسعـد ناديـت = كل سـرٍّ كميتـه بالهـوى باحـي
أحسب إنّي نسيته يوم عنْه أقصيت = وأثر شوف الحبيّب نقض الأجراحي
آه لاعـاد ربّـي مرقـبٍ عدّيـت = فوق راسه ودمع العيـن منساحـي
يوم هبّ الهوا بـه للنّظـر مدّيـت = وأثر ماحولي إلاّ نـوح الأرياحـي
قلت ياذا النّسيم اللي بنـا مرّيـت = كود مسّيتهم أو جيـت باصباحـي
رَدّ لي يوم ذعذع شفتهـم بالبيـت = ماعليهم خـلاف بسعـد وأفراحـي
قلت يعني نسوني يوم أنـا قفّيـت = وإشربوا يمّ غيري صافي الرّاحـي
قال هذي عوايد كـل حـيٍّ جيـت = كل فرقا تناكـر فيهـا الأرواحـي
قلت ما أخْطا الحبيّب لا ولا زلّيـت = مير أنا عقبهـم مانـي بمرتاحـي
واحسايف علـى ودٍ لهـم كنّيـت = يوم تِسْهِر عيوني كثـرة انواحـي
راعي الودْ لو يكمى طلع له صيـت = للهوى وسم باللّـي يلحقـه لاحـي

تضيق روحي .. كلّما حلّ طاريـك = يوم إن يطري لي بعادك وجفـواك
ياللّي نسيت القلب ماهو بناسيـك = سلواه في دنياه عطـرك وذكـراك
العام تغليني وأنـا مثلـك أغليـك = رجواي قربك وأنت بالقرب رجواك
واليوم عن دربي تباعد خطاويـك = الله على تحطيـم قلبـي بيجـزاك
طاوعت عدواني وفرحت أعاديـك = وأسقيتني كاس المـراره بيمنـاك
يعني نسيت اللي بـودّه مصافيـك = بالحبْ له دايـم تبـرّر خطايـاك
ياليتنـي طاوعـت عذّالنـا فيـك = قبل أنصدم في منطق الحب ويّـاك
الحب ماهو كلمـةٍ بيـن أشافيـك = تضحك بها وتحطّم قلوب تهـواك
الحب ماهو مدح هـاذي وهاذيـك = ولاهو قناعٍ ترسمه فـي محيّـاك
والحب ماهو لعبـةٍ بيـن أياديـك = الحب أسمى من تصرّفك وريَـاكْ
الحب شـيٍ ماتحوفـه طواريـك = مايعرفه من كان مثلـك وشـرواك

أنوح نوح الرّاعبية على غصن = وإن ذعذع الغربي تزايد بكاهـا
غديت كنّي طارد القوم ياحسـن = من دون سيف وقربته ماملاها
واللّي حداه لطردهم زايد الغبـن = والغبن للعين البصيره عماهـا
ويوم إلتفت لخلاف ثم ٍ تيامـن = شاف إن نفسه دوّجت في خلاها
عوّد كما عود المقفّي على شنّ = ظميان لكن ضاع بالشّن ماهـا

أضْحك وقلبي دالـهٍ عقـب فرقـاك =وتَضْحك وقلبك دالهٍ عقـب فرقـاي
ماكنْت أظنْ بيـوم أقـدر وأنسـاك = وأحرق رسايلك الحبيبـه بيمنـاي
يوم الزّمان المرْ عن دربي أقصـاك = أرسلت لك مع داجي اللّيل نجـواي
تمشي وجعل الخير كلّـه بممشـاك = وأمشي وجعل الخير كلّه بممشـاي
ماجِبت لي طريا ولا جِبـت طريـاك = طرياك تجرحني وتجرحك طريـاي
وياكبـر همّـك ياحبيبـي وبلـواك = إن كنت ترجيني مثل ما أنت رجواي
طابت نفوس إعداي ياشوق وإعداك = يـوم افترقنـا قلـت لله شكـواي
بالحبْ ممشانا على ضيم وأشـواك = وماكان ودّك تدعس الشّوك ويّـاي
ياما جبرت النّفس بالهون لرضـاك = وأنت إزْعلي عِنْدَكْ كما شُربة الماي
واليـوم ماكِنّـي تمنّيـت لقـيـاك = وإنتـه ولاكنّـك تمنّيـت لقـيـاي
ضاع الهـوى مابيـن ذولا وذولاك = والله بحبّك يجبر إعزاك وإعـزاي

ياشـوق لاتسمـع كـلام العواذيـل = اللّي يبون لشملنـا اليـوم تشتيـت
تـراي لاجابـوا عليـك الأقاويـل = صدّيت عنهم ياهوى البال وأقفيـت
أهل الحسد يرجون من يمّي الميـل = وأنا عزيز وكلْ ربعي لهـم صيـت
شِف ياحبيبي حالتي ويل مـع ويـل = وعز الله إنّي من عرفتـك تعنّيـت
أكابد الحسـره علـى طايـل اللّيـل = وكلْ السّهر دمع وقصيـد وتناهيـت
قالوا علامِك قلـت وقـت الغرابيـل = أخلف عليّ اللّـي بغيـت وتمنّيـت
قضيت عمـري بالشّقـا والبهاذيـل = وآخر عذابي ياهل العـرف حبّيـت
حبّيـت حسبـي بالمحبـه تساهيـل = وأثري على كبدي من الجمره أركيت
واليـوم ماتنفـع معـاي التّعاليـل = لو قلت أبصبر باح سـدّي وونّيـت
وين أنت وينـك ماتـردّ المراسيـل = الشـوق عنّانـي ولا فـيّ حسّيـت
يامختصر عندي جميـع الرجاجيـل = ماشفت غيرك لا ولا لغيرك أوحيت
ياعالمي يانبضـة الحـسّ والقيـل = يادمع قافـي يـوم للقـاف خطّيـت
عوّد علـيّ بريحـة البـنّ والهيـل = وقولة هلا بالهجر عز الله أخطيـت

ياطير ياللّي بالسّما تـدرج الحـوم = ما اهناك بالجنحان ماشفت حالـي
أقنب قنيب الذّيب واقعد ولا آقـوم = وانا عن المطلوب تقصر حبالـي
والكبد مضيوم ٍ من الهمْ ماسـوم = ماكنّني من عقب شيخ الرجالي ..!
هذا زمـانٍ فيـه ظالـم ومظلـوم = ومافيه بيـن الحالتيـن اعتدالـي
الحرْ غادٍ فرخ واستشيـخ البـوم = وصار الرّخم ينقز على راس عالي
وين الشّيوخ مزبّنة كـل مضيـوم = حالـن عليهـم مدبـرات الليالـي

لا تقول تسهر يكوي القلب همّـك = ياما سِهرْت وضامري منك ملهود
وياما شِكيت وقِلت لـي مايهمّـك = ودمعي وآهاتي على ظلمك شْهود
وياما نهرت اللّي بهرجـه يذمّـك = ردّيت منهو يملك الزّين محسـود
واليوم ياجعـل البـلاوي تعمّـك = عساك في دنياك ماتلتقـي فـود
ودّك تحرّك جذوة الشّـوق يمّـك = لا والذي سوّاك ماعادت أبَى اعود
لو كان تبكـي ياحبيبـي بدمّـك = وأشوفها تجري من عيونك السّود
سمّيت حالي قبل واليـوم أسمّـك = وإن قلت كافي قلت لا لا بَعَدْ زود

بكت عيني وياقشر الدموعـي = على حرٍ يرى نفسـه رفيعـه
ألا ياقلّ بين النـاس نوعـي = قليل اللّـي زمانـه مايطيعـه
فلا طعته ولا جانـي بطوعـي = وغدت حربٍ مصايبهاسريعـه
قطعـك الله ياوقـتٍ قطوعـي = علاما لـي تبدّيـت القطيعـه
بعض ناسٍ يجي همّه مزوعي = وأنا همّي تليّـم لـي جميعـه
دهاني في سيوفه والجموعـي = ودكْ حصون من صبري منيعه
فلا قلبٍ على حالي جزوعـي = ولا إذنٍ لشكوايـه سميـعـه
وحيده وأكثر العالـم ربوعـي = نهيبـه للهواجيـس الفظيعـه
زرعت وصرّم السافي زروعي = لفى صيفه قبل يلفـي ربيعـه
أنا يمكن غريبه في طبوعـي = أو الدنيا لهـا هـذي طبيعـه
تصوّر لي مثل ضوْ الشموعي = وأقرّب وألتقي دونـي فجيعـه
وأقول إنّي عن الفرحه قنوعي = تعيف النّفس مـالا تستطيعـه
قنعت بكسرةٍ تجتـاح جوعـي = وأنا مثلـي مكانـه بالطليعـه

واقلبـي اللّـي غـاديٍ لـه تخافـيـق = وأخـاف مـن بيـن العلايـق يـفـرّا
أروح ما ادري وين ..؟ من زايد الضّيق = احتـرت مالـي بالـوطـا مستـقـرّا
وتفتّحـت بيـبـان قـلـبٍ مغالـيـق = قلـبٍ علـى كتمـان سـرّه مـضـرّا
وين الصديق اللّـي يصـون المواثيـق = ماحولـي إلاّ مــن نـوالـي بـشـرّا
أمشي وأنا من سكـرة الفكـر مافيـق = ولوني وطيت الجمر ما أونسـت حـرّا
وقـتٍ تــولاّ غيـرنـا بالتوافـيـق = واغـدى علينـا عقـب حلـواه مـرّا
وإليـا رفينـا ثوبنـا فـيـه تفتـيـق = وإليـا جبرنـا كسـرنـا زاد كـسـرا
كـلٍ رمـانـا بالسّـهـوم المطالـيـق = وكـلٍ تمنّـى يـوم جيـنـاه عِــذرا

عيني اللّي سِعدها من شوف ( نوره ) = علّ ماتبكي على ( نـوره ) عيونـي
كان جَتْ يمّي فانا صِـرت مسـروره = وكـان عنّـي روّحـت لا واغبونـي
رحـم أبوهـا يومنـا كنّـا بـزوره = ماتزعّلنـي ولـو هــم زعّلـونـي
خيّتي وقـت الشّدايـد لـي صبـوره = يوم بعض النّـاس بالشّـده مهونـي
خيّتي وإن صارت الحـال إمعسـوره = وقّفت يمّـي ومـن حولـي ودونـي
وكان زانـت لـي مـن الأيّـام دوره = جـتْ تبشّرنـي بتوديـع الحزونـي
علّنـي فـدوه لهـا مانـي نكـوره = مثلما صانـت تـرى حِنّـا نصونـي
حقّها بالقلـب مـن دافـي شعـوره = وحقّهـا بالطّيـب نافـي مانخونـي
عيني اللّي سِعْدها من شوف ( نوره ) = علّ ماتبكي على ( نـوره ) عيونـي